सानसे दैज्लांनि खन्थाइ Poem by Ronjoy Brahma

1

आलायारन समनिफ्राइनो

जों बयबो बुजिनो हायै

बुजिया सोमजिया जुगु जुगु गाबनाय

दाउथुफोरा दा बोजों बिरलांखो, बोजों एब्रेहैखोथाय -


बे समाव दा बिसोर सिरि जाबाय।


2

गय बिफांनिफ्राइ बिरननो रोंस्लिंनाय

दाउलुर फिसाफोरखौ बिमाया

सानफाथोलो गांखं बुब्राबनो फोरोंबाय थादोंमोन

फांसे बिफांनिफ्राइ फांसे बिफांसिम बेबादिनो-


बिसोरखौ आं बिरलांनाय नुदोंमोन।


3

दाउज्लाफोरा गेसेरदोंमोन हाथर्खि गोमोरस्लाबमोनै

आफायाबो हाल हुरनलांदोंमोन,

अरदाबाव उदै फोलोमनो हानाय ओंखाम बोथिसे

ओंख्रि नाङा बेदर नाङा थौसिसे बाथोन देनायाव-


बेबादिनो आयनि खाफालाव थाबथाफैदोंमोन सानाबो।



4

जानजियाव जेखाय आरो खबाय

बिखासे मिजिं मिनिस्लुनाय लानानै सोरबा थांदोंमोन

मोखां फोजोंना बिलो जामफै ना गुरनो,

जेयाव जिबौबो नांदों नाबामिबो नांदों -


बेबादिनो सोरबा ना सारदोंमोन दैबानायाव।


5

फुंनि सान गोरलैनि मोखां नुहरनाय लोगो लोगो

बिबार बिथराइफोरा जुरिजेनदोंमोन गेवलांनो,

बेरे सिखिरिखौ आरो मा बुंबावनोसो जायो

मोदोमफ्रुदोंमोन जोंनि बारि बागान-


बिफांनि बिबार फिथाइ गासै सानथ्रहायै।


6

जाख्रिसे अखा हानाय समाव

एमबु बंग्ला गाबदोंमोन दानदिसे सम

मानैसो जेसे हायो एसेबांनो गारां फेदेर फेदेर,

सानैसो बायगर गथ'फोरा बिसोरखौनो -


सिरि सिरि हमनो दावगालांदोंमोन।



7

सानदुंआ दुंदोंमोन जेबोला

रिउरेवा आरो गावरेमा गांफौफोरा गोसायै गाबदोंमोन,

गथ'फोरा गानदौला आरो लामाखान्दाइ बोनदोंमोन बे समाव

अखाजों सिनाय बिफांआ गसंख्रांदोंमोन-


बेबादिनो दाउसिनफोरा गांखं फिस्रिदोंमोन।


8

सासे बोराया बिफांआव मोनफ्रामनाय

खानथाल फिथाइखौ गले गले

गावनि आसि आसुगुरजों गावनायबाय थादोंमोन,

बेलासियाव बियो बेखौनो -


फाननो लांदोंमोन आरो खुसियै फैफिनदोंमोन।


9

अख्रांनिफ्राइ दुब्लियाव बिरख्लायलाय

खेबसेबा बाग्लायना थाबायग्लांनायजों

बेबादिनो सानखौ हगारहरदोंमोन

मासे हादिदग्ला;


दाउब', फानखावरि आरो हांसो सिलारिफोराबो बेबादिनो गेलेदोंमोन।



10

अखा सिजानाय बिफां-लाइफांफोरा

गुसु बाराव मोसादोंमोन,

हाजोखौ आरोबाव माथो बुंबावनो?

अख्रांआ सानसेनि मादावनो गमामायै -


बियो गोबां महर लादोंमोन जायख्लंनिख्रुइबो।


11

आफाया हालेवदोंमोन बेनि सेरावनो

आयआ खोथिया फुदोंमोन,

बे समाव दाउस्रिफोरा गावजोंगाव

दाउराव खालामदोंमोन जोंनि दुब्लिखौ-


बिसोर गावजोंगाव आदार दौलायदोंमोन।


12

आयजोफोरा गावजोंगाव मोनसे सम मिनिलायदोंमोन

बाथ्रानि गोबां बिदै लोंनानै,

आफा दाउदैआव खुज्रावजानाय हाब्रुआ खुसिजोंनो

दुब्लिनि ओलांनाय दैयाव बारसोमदोंमोन -


हांखुरै अख्रांआव जोमैफोरा खारसारदोंमोन।



13

हाल हगारनाय सासे आबादारिया

गावनि मोखांआव हाब्रुनांनायखौ होखारनो

जामफैयाव दानदिसे लोहाबदोंमोन,

साना अब्ला बिनि थिखिनियाव सफैथारबाय


बेबादिनो बियो नायदावहरदोंमोन।



14

न'नि खामसालियाव दाउसाफोरा खायसो खालामदोंमोन

आयआ बिसोरनो सिद्लायाव एंखुर सारना होदोंमोन,

बोथिसे थेब्रे जानानै सासे आबादारिया

दुब्लि फारसे आलि खोनो थांफिनदोंमोन


आयजोफोरा माय गायनो जुरिफिनदोंमोन।


15

सानै गथ'फोरखौ दैसायाव आं ना बोननाय नुदोंमोन

बिसोरनि लामा सेरजों सासे आयजोआ

थाइलिर गोमोन खादायाव रुजुनना लांदोंमोन,

बे समाव बंफांआव आरोबाव दाउथु गाबदोंमोन


फाथो बारियाव दाउलुरा एमफौ नागिरदोंमोन।



16

सासे आयजोआ थास' बिबार नागिरदोंमोन

गोजानाव सोरबा बायदिसिना मैगं खादोंमोन,

बे समाव दुब्लिनिफ्राइ आबादारिया गिदिंफिनबाय

गाथोनाव गथ'फोरखौ आं बारज्रुमनाय खोनादोंमोन


गला फारसे गोबांआनो साइकेल सालायलांदोंमोन।


17

सुबुंफोरा गलायाव गावजोंगाव रायज्लायदों

साहा गुदुंआव खुगाजों बार सुयै सुयै

हुरा हुरा गावजोंगाव मिनिलायो

आयजोफोरा मैगं थाइगं फानदोंमोन -


बेबादिनो बिसोर न'फारसे गिदिंबोफिनो।


18

दुब्लिनिफ्राइ आं मोसौ लाना फैनो थांनाय समाव

गुमा दाउराइ आरो थेबथेफारिया

आंथिंनि सोदोबाव बिरग्लांदोंमोन

बे समाव साना सोनाबनि फैसालियाव -


लासै लासैनो दावगालांथारबायमोन।



19

बबेबा दब्लायसे हायाव दुलाबाथा दाउसिना

उब उब होननानै गाबदोंमोन,

बबेबा खनाजों दाउ गुल्दुब गाबनाय खोनादोंमोन

बे समाव आं गोसो जादोंमोन -


गोसो होसारना दोंसे मेथाइ रोजाबनो।


20

फोथाराव खारख्राव-खारसि गेलेनाय गथ'फोरा

न'फारसे गिदिंबोफिनबायमोन

बे समावबो मोसौफोरा गांसो जानो नागाराखै

बारियाव दाउसा मोख्रेबा मेगन मेसेबबायमोन -


बेबादिनो मोनाबिलिया जेन बिरबोदोंमोन।


21

अखोरां बुंजासे बाथ' दाउसिनफोरा

साहानिफ्राइ खोलाहा बिरलांदोंमोन

सानफाथोलो आदार रोगानाय जे जलंगि दाउसिनफोरा

बे समाव बासायाव एब्रेबायमोन-


होनबा आं दुब्लिनिफ्राइ मोसौखौ गलियाव खाफैबायमोन।



22

बिमाया लाबोनाय मेथायखौ

गथ'फोरा राननानै जालायदोंमोन जानांगौ

मोनाबिलिया जेरैबो मानसिनि सिरि

बे समाव गुमा संग्रा गाबनायनि आराव -


गोमोथिं आरो गुबुन गुबुन एमफौफोर गाबदोंमोन।


23

आयआ अमा आदार होनायनि उनाव

मैगं हानो जुरिजेनदोंमोन

बे समाव आं दानदिसे फरायबाय थादोंमोन

सुदेम खोलो खोलो बारा बारबोदोंमोन


उखुमाव बादालिया माबा फिथाइ खोलैफैदोंमोन।


24

गामि नाङैनो हुरा हुरा बेदर ओंख्रि आरो

बाथोननि मोदोमनाया  बाराव गोजावदोंमोन

मोनसे थौसि गाबनाय खोनादोंमोन

हुरा हुरा जोंलाइ-गोमोरलाइ खोमसियाव


सांग्रेमा एमफौफोरा बिरबायदोंमोन।



25

लासैनो अख्रांआव हाथर्खिया जोंखांदोंमोन

सानफाथोलो दुब्लि खामानि मावनाय आफाया

सिद्लायाव जिरायना नायहरदोंमोन,

लासैनो अखाफोरा सानजानिफ्राइ दावबोदोंमोन


बेबादिनो अखोरांआ समायनासिन जादोंमोन।


26

दानदिसे समाव अख्रांखौ जोमैया साग्लोबनो फैयो

हाथर्खिफोरा गोमोरलांदोंमोन हरखाबै आरो

हरखाब जुब जुब अखा हादोंमोन,

सोरगिदिं जेरैबो खोमसि जादोंमोन -


बारि खना आरो दुब्लिनिफ्राइ एमबु बंग्लानि गाबनाय देंखो गोजावबोदोंमोन।


27

दासानदि समायना दैज्लां बोथोर

आबादारिफोरा अखाखौबो मोजां मोनो

सानदुंखौबो मोजां मोनो,

बयनिबो गाबनाय बयनिबो अनसायनाय आरो


बयनिबो गोजोनै थांनानै थानायखौ लुबैयो।