आं बेखौसो दाबि खालामो Poem by Ronjoy Brahma

आंहा गन्थं दंजायो। मोनसेल' गन्थं नायल'-जाल'। बेखायनो रावनोबो हरनो हाया आं बेखौ। बे गन्थंआ आंनावनियावनो थाबाय थाथों। आंहा सालाइ दंजायो। बेबो नायल'-जाल' मोनसेल'। गोखै, गोबाब, फादुब, गोसा आरो गोदै बायदिसिना सुवाद बेजोंनो मोनदाङो आं आरो बे सालाया आंनियावनो थाबाय थाथों। आंहा मोनसे खुगा दंजायो। गोसो जायोब्ला आं बिजों मेथाइ रोजाबनो हाथों, बाथ्रा फंसे-फंनै बुंनो मोनथों आरो उखैयोब्ला जानो मोनथों आदार। आंहा आथिं-आखाय दंजायो बेफोर अंगफोरा आंनियावनो थाबाय थाथों। आंहा गोसो आरो गोरबो दंजायो आरो बेफोर जेब्लाबो आंनियावनो थाबाय थाथों।

आं बेखौसो दाबियो। आंनि अंगफोरा जाहाथे रावनिबो आखाय मोजोमाव दाथाथों। आंनि अंगफोरा रावनिबो दाजाथों आरो रावनिबो अंगफोरखौ आं खावनानै एबा सेनानै लानो गोनां दाजाथों। आं बेखौसो दाबियो। नोंनि अंगफोरा नोंनि अंगबादिनो थाथों, नोंनावनो थाथों गोजोनै। बेखौनो लानानै नों जोबोद खुसियै थाथों। आंनि अंगफोरखौ लानानैनो आंबो खुसियै थानो हाथों। नोंनि अंगफोरखौ आं मोजां मोननो हाथों आरो आंनि अंगफोरखौ नोंबो मोजां मोनबाय थानो हाथों। आं बेखौसो दाबि खालामो।

नों आंनि अंगफोरखौ नायैनो नायैनो मेगन सानो नाङा। अननानै नों आंनि गन्थंखौ  हासनानै होनो दासान। आंनि सालाइखौबो हासनानै होनो दासान। आंनि खुगाखौबो माथुनानै होनो दासान। अननानै नों आंनि मोदोमाव हाद्रि सारनानै होनो दासान। नों आंनि गस्ला आरो गामसायाव हाब्रु फुननो नाङा। आंनि गाननाय आरो जोमनायखौ नुनानै नों खुनानै होनो थाखाय दासान- आंबो साना। आं बेखौसो दाबि खालामो। आंहा जा अंगफोर दंजायो बेफोर अंगफोरखौ आं नांगौ जानाय समाव बाहायनो मोनथों। बेनो आंनि मोन्थाइ। आंनि जिउनि मोन्थाइ; नोंनिबो मोन्थाइ बेयो।