मा खन्थाइ लिरबावनो दे! Poem by Ronjoy Brahma

गोसो थोनायनि जेबो खायसो बाथ्राफोरानो दा गैलिया। सान हाबनायजोंसो जेन हाबलांफाबाय! फैफिनाखिसै फिन खेबसेबाव। आंनाव दा मोनसेल' एलेकट्रन दंसै-दिदोम। मा खन्थाइ लिरबावनो दे….! गाबनो गोसो जायोब्लाबो दासानदि गाबनोबो हाया। मिनिनोबो हाया गोसो होसारनानै, मिनि खैरोनोल'सो हायो। बेवकूब बोथोरा बेवकूबआनो-नंगौ। दानो बांग्रिं दानो सारअन्थाइ। बेफोरखौ बारा जिंगा सिनांगौ गैया होनबाबो…. जिंगानि सावराय जानाय बाथ्राया जादों राजा लामायासो। जेथ' राजा लामायानो। जों खन्थाइ आवरायनो हान्थिलांग्रा लामा। जों लोगो हमलायनो थांग्रा लामा। नंराय सावगारि, गोमोथाव गोमोथाव मोखांफोरखौ नायनो थांग्रा लामा। राजा लामाखौ मेरु खालामनानै दोंसे खन्थाइ लिरनो हायोब्ला बहुत मोजां जागौमोन। नाथाय आं हायाखै लिरनो! बेवहाय दा गाड़ी साखाफोरनि उदखाराव थैबाय थायो मावजि गुफुर आरो गोसोम। बिगोमा गोनां सैमा बिगोमा गैयै सैमा। गांसो मोनजानाय मोसौ गांसो मोनजायै मोसौ। बेवहाय गलाङो सोरनिबा रजे फालि। बेवहाय गलाङो सोरनिबा मायरं बसथा
सारि जायो खुदिया। गथ'आ गाबो बिमाया खुसिजों मिनियो। आंनि मेथाइआबो राजा लामायावनो जोनोम जादों। नाङाखै संगित निकेतन, नाङाखै रिजीं स्टारफोरनि प्लेटपर्म।

राजा लामाखौ दा मानो होबथानो? आं गाबनो ओंखारो….!

राजा लामाखौ होबथानांगौ ना होबथा नाङा? होबथानाया मोजां ना होबथायैआ मोजां? होबथानो ना होबथाया? बेनि बागै मा खन्थाइ लिरबावनो दे....!