मानसिफोरा दा मानसिफोरबादिनो Poem by Ronjoy Brahma

गोरबो सिंनि फंसे बाथ्रा बुंनानै
गावनि आंगो खालामनो नागिरदोंमोन आं मानसिफोरखौ
आंनि राव आरो मोदोमनि बिगुरखौ नायनानै
मानसिफोरा नाथाय बुंजानो नागिराखिसै
बेनि थाखाय साफिनो हायाखै आं मानसिफोरनि सेराव
आरो आं मिथिबाय
आं बुंनो साननाय बाथ्राया
आबारि रुवाथिनि सालाइ बिजौआव बादिंग्लायनाय
मस्ला गरसेनि बेसेन गैया

बिसोर जायो गोबां मस्ला
गोबां बिगाब आरो लोङो गोबां रोसि

बिसोर जायो गोसोबादि गोसो जायोब्लानो
बिसोर लोङो गावसोरनि गोसोबादि लोंनो लुबैब्लानो
बिसोर गोसोबादि रायज्लायो
मावो बिसोर जेखौ गोसो गावसोरनि गोसोबादिनो
मानसि बिसोरो बयनिबो गोजौ सिनाव थानाय
नाथाय बिसोर आंनि आंगो जानो हायाखिसै
बेनि थाखायनो मोनसे जिंगानि रोदा सुथाबदों आंनि गोसोआव
बिसोरनि इयुन जोलैफोराबो
आंगो जानो हानाय नंला नामा आंनि
मानोना बिसोरबो गोसोबादि सोलिग्रा मानसि

बेखायनो दिनै मानसिफोरनि बागै आं मा लिरनो
मानसिफोरनि बागै गुदि खिथा सोरबा सोङोब्ला
आं बुंगोन- मानसिफोरा दा मानसिफोरबादिनो
दासिम रावबो रावनिबो आंगो जानो हायाखै