दे जों आरोबाव एसे आवगायबावदिनि Poem by Ronjoy Brahma

एसे नोजोर होयोब्लानो दा जों नुयो
बुब्लि मोनफ्रोमबो थैनि दागो
आंनि फंबायनि आखायाव लहानि सेलथाव
आदानि आखायाव दं गोसोम जाथा

आंनि सिमांनि सोरांनि फर फर
आसागि-बैसागि आरो आलारि दामब्रा बावबुलि राजा
गिनाय मोनो आं बिसोरनि गोसो थोलायनायखौबो
मानोना बेवहायबोदि सोमहाबो बुब्लि-    सिरियो अखानि बर'फ

आं सानो बेखायनो गेजेर गेजेर नों गावनि उदायै सानस्रिखौ
ओलैस्रो फुथुनायानो मोजां
उदायै बाथ्राखौ गावनिनो गोसोनि सिमायाव लाखिनो
खुगायाव मुखारि गाननानै लानांगौ

मिथिगौना लोगो?
खामानिनो बोथोर बेयो

आफाया बोरायबाय आंनो हालेवनांसिगौ
गोरान हायाव आरो खुरखाहां खुरखाहां दैमानि सेराव
आं फंनैसो बुंनि- दे जों आरोबाव एसे आवगायबावदिनि

अलसियानि बेन्दोंखौ बस'नानै
मैदेरबादि सोगोमनानै राजा लामाजों मोस्रोम महरै
बे थैनि दागो बुब्लिखौ दै गोथारजों जिग' जिग' मानजिनानै

आं फोथायो जोंनि सिमांआ खिलिखांगोन
बे हायावनो रोदा सुथाबनानै
गेरेमसा बिफांआ गसंखांगोन अख्रांसे मिजिंजों
आह! बेसे गोदै बेसे गोदै देंखो बोगोन दाउसिनफोरा

बोथोरा दा गोदानै फैफिनबाय मायज्लि बुथुमनायनि
बिबार बारग्लां होनो
फिथाइ थायख्रिहोनो मैला नांनाय आखायफोरखौ सुनानै लानो
बोथोरा जोंनो दा गोगो दैखौ हा सिंनिफ्राइ लानानै फैबाय

बाला लोमसाव फैगोन जोंनि गायग्रा हायाव
हाग्रा दुगोन नबथि आरो जिबौ-जिबाद हाबफैगोन
सैमाजों मावजिजों अरलायगोन
गं गोनां मोसौआ गं गैयैखौ सौथारगोन बेनि थाखायनो


नै न'नि बिगोमा मोजाङै दिथा होदो दे!