आंहा दा खाफालआ मोजां Poem by Ronjoy Brahma

आंहा दा खाफालआ मोजां
- - - - - - - - - - - - - - - - - - - - - - - - - - - - - - - - - - - - - - - - - - - - - - - - -

खावनै जानाय हाजो सेराव आं गेलेदोंमोन
बाराव बिरबायनाय सुफिननि देंखोबादि
बोहैदोंमोन गांसे बिलाइ दैनि रुगुं रुगुं
आं दंमोन बिलाइनि सायाव जेन मासे मोस्रोम......!

हादिदग्लानिखौगायाव बाब्राबनाय नास्राइ गोरैबादि
बाब्राबदोंमोन आं सोदोमस्रिनि गां बुब्राबनानै

राहा गैया आं दा थैबाय
सासे थं गैजायै बिदेशीबादि

खोमसिनि गेजेराव आं आरो मा बुंबावनो?
दानसोरांनि सिगांआवनो आं जेबो बुंनो हायाखिसै
गोजामफोरा थैलांदों
बेबादिनो आंबो थैफादों गोजाम जानानै खनले खनले

नोंसोरनि बाय-बाहागि गासैबो मिथिगौ
आंनि गासै लोगोफोराबो मिथिगौ
गोदानफोरा गमामा खारमारो गोजाननिफ्राइ गोजानसिनथाराव
होसो सेयावबो मोना सोदोबफोरखौ

आं होसोदोंमोन मासे हांसो
दावलांबाय गोजानाव

जिउफोरा दा नों मिथिगौ
मोब्लिबनि थाराव गथ' गोरलैफोरबादि बादुंगा गेलेयो
जों गेलेयो उखुन्दैनि गेजेराव थाखोमालायनाय
दैस्लुंआव अख्रां नुनानै बेवहायनो उरां बिरहोयो

बेनो मोजां जेराव जों सानैबो थैबाय
आं खांख्राइ खल्था जानानै थाबाय
नों खुसुं खल्था जानानै थाबाय

बेनो मोजांबो खल्थानि सिङावनोदि मोनसे जिउ थांनानै थायो......!