थमेननाइ साननि फाइलियाव Poem by Ronjoy Brahma

आसिननि खोलो बारा हांसो सिलारि जानानै
बाग्लायफैदों फुंजानि फुंजानि गौरांनि बिखा आंसोलाव
खुसिजोंनो निहिरफोरा बाज्रुमदों गथ'फोरबादि
बिलाइनिफ्राइ बिलाइ बिलाइनिफ्राइ बिलाइ……

आं रोजाबदोंमोन गोसोथोनायनि गोदोनि
मेथाइ नांगोल मुथियाव जोनोम मोननाय आबौ जोनोम जानायनि सिगांनि
बासिराम जोहोलावनि गराइआ गंगार हाजोखौ मानखो हैनायबादि

हरसेमानि आबैजों रायज्लायफैनाय
दमासि बोथोरनि गुरसे फिथासे अखाफोर गावदांआ
दा आबैनि गुरजि मोखांबादि मिनिरोम रोम नायहरदों
हय हरआ सुंसिनबायहाय होननानै सानदों बियो…..

इसोरनि लामाखौ दाउखि नांनाय हासिबजों सिबनो थांनाय मानसिया
ओंखारबोदोंमोन बांगाल थैबादि गस्ला गाननानै
फाख्रि बिफांआ बिखौ नायहरै नायहरै गाबदोंमोन
रहाय आदा र', रहाय आदा र' होनै होनै

आंनि बिखुंआव आखायजों नारफैनाय सानआ
आंखौ सोंदोंमोन जानांगौ -
नों बेवहाय गसंना मा नुसोगारदों गथ'?
अब्ला आं गावखौनो हाग्रा बिफांफोरखौ बेंखननाय बादि मोनदोंमोन

ओइ आमोखि नोंनि थाखाय आं गासैखौबो बावजोबगोन
नाथाय हले आं नोंखौ बावनो हानाय नङा दे
आंखौबो दाबावखा! बेखिनियानो बाथ्राया
बोसोर बोसोर नों आंनि गोदोनायाव बिबार माला गानहोफै
सोनाबनि अखाफोर बुरै आरो आजोला मुलुगा रायज्लायदोंमोन सिरि सिरि