रावबो गैयै गंसे न' Poem by Ronjoy Brahma

सासे आइजो दंमोन
बियो बे ननिफ्राइ खारखोमालांदों
जाय नआव मोनबो साबि होनाय दरजा गैयामोन
आरो मोनबो नेमखान्थि बेवहाय गैयामोन
बियो माखासे खोरखिनि आइना सिफायलांदों
आरो माखासे खोरखिनि लहाफोर-
बबेखानि बिनि अनगायै बे ननि रावबो बिगोमा गैयामोन।

बियो खानानै नोसथो खालामो
ननि लांगोनायाव बारफुनाय
इनायनो समायना-रमायना बिबारफोरखौ
बिबारफोरनि मोदोमनायाव गोबां बेरे सिखिरि बिरबोदोंमोन
दा बेवहाय बिबार सेवनायनि गोबां मोनामनाय सिखारदों।
आरो थै लोंग्रा थामफैफोर

आखायजों सोरजिनाय
गोबां आइजें आइलाफोर दंमोन बेवहाय
बेफोर लासै लासैनो सेवलांनो हमदों
लांगोनायाव गंसे मथर दंमोन
बेनि गाबफोरा गुगालांबाय
आरो इनायनो माराम खाफबबाय

सोरगिदिं बे नआ दा नायनो बेसेबांदि गाज्रि
बेखौ मेगनजों नुनाय मानसिफोरा बयबो बुंबाय थादों

बेसेबा गोबावनि उनाव बे नखौ सासे फाग्लिया दिनै नुसनफैदों
आरो गावनि बिखा-बिख्लो-
देहा-सोलेरजों आरो गावनि गाननाय जोमानयजों हाजासे रुजुनानै नायदों
गोसोखौ दिदोम खालामनानै सानदों बियो-
बेसारा दा बे नआ आंबादिनो जाबाय!
रावबो बे नजों जेबो सोमोनदो गैया
रावनिबो अनसायनाय मोनाखै बियो आंबादिनो!