खन्थाइ लिरनो हायाखै आं Poem by Ronjoy Brahma

28 दिसेम्बर 2018

खन्थाइ लिरनो हायाखै आं

मोनसे बुब्लि आरो मोनसे बोथोर। बिसोरखौ बिदाय होनो गोनां जादों आं। बेवहायनो नांथाबै नांथाबै खन्थाइनि नसिम थांनो सम मोनाखै। सम मोनाखै गोरबोनि फंनैसो बाथ्रा बुंनो। बियो रेबगननि गोदोना सेरनानै बाथ्रा बुंनो हायाखै। खाखोरनि फैलाव अख्रांआव दाउब'नि गांबादि बिरफुंहोनो हायाखै सोदोबफोरखौ। फैलाव उदां खाखोरा आंखौ लाजि फोनांदों खन्थाइ लिरनो हायैनि थाखाय। बेखायनो आं गाबदों सिरि सिरि रावबो खोनायैबादि।
मोनसे बोथोर दंमोन। जाय बोथोराव जों सानैजों गोबां बाथ्रा फोरमायलायदोंमोन। फाला-बदलै गाबनो हामा होननानै बुंलायदोंमोन। खुगानि खुदै, खोमानि खि, गनथंनि खि आरो मेगननि खिफोरखौ मोजाङैनो सुनानै लानो बुंलायदोंमोन। जों सानैजों आरोगोसोफोरखौ सेंग्रा गिदिरबादि बुजिना जानो थाखाय बुंलायदोंमोन। रायज्लायै रायज्लायै आं नोंखौ जोबोद मोजां मोनखोमादोंमोन। मोनसे गोदान लामा आरो गोदान थुलुंगा मोननायबादि मोनदोंमोन आं। सानफोरा सानफ्रोमबो गाहामैनो थांबाय थादोंमोन। नाथाय आं मोजां मोननायबादि नों आंखौ मोजां मोननो हायाखिसै!
बिखानि बेसेन। गोरबोनि बेसेन। थैरोङै खर'नि अजन। बेसेबांदि गिलिर माबोरै सुनो हानो नोङो?
आं गाबदों नोंजों मोजां मोनजायैनि थाखाय। नों मिथिगौना? ? अब्लाबो आं नोंनिख्रुइ खुसिसिनबाव आंनि बिखाया नोंनिख्रुइ अरसिन होननानै। आंनि गोरबोआ नोंनिख्रुइ फैलाव आरो गोथौसिन होननानै नोंनिख्रुइ गोजोनसिन आं।
मिथिबाय? नों दा सिखाव जाबाय। मानसिफोरजों हमजाबाय। नोङो नंखाय-बाखाय आंजों ओंखाम-ओंख्रि संनाय गेलेबाय। नोङो मेंबाय। बालानि न' लुबाय। नों आंखौ अरदाबाव फजबाय। नोङो फोथायखेबस' होनजाबाय। अब्लाबो आं गले गले बुङोदि- आं नोंखौ दाबो मोजां मोनो। मानोना आंनि आखाय फारनैया दा गोबां हाजोल' नङा गोबां हादोर बुथुम बुथुम गोबाथुमनो हानाय जाबाय। नाथाय बे बाथ्राखौनो लानानै खन्थाइ लिरनो हायाखै आं! !