सावगारि नोंनि आरो गोसो आंनि Poem by Ronjoy Brahma

आं बबेहाय दावबायदों
आंनि दावबायनाया थाद'नाय आरो थुंगेनाय फैयाखै
आंनि दावबायनायखौ आंहा गोसोआव फैया
गोसोआव फैयो नोंखौसो
नै अन्थाइयाव गसंनानै ना बोनबाय थानाय आइजो
नों आंखौ गंसे गोदान मुलुग सोरजिहोबाय

सायखं नुनाय बेसेबा गोथौ दैमा
दैमानि सिङाव आदार नागिरनाय उनदै गेदेर ना
दैमानि सायाव होंगो दोंगो दावबायारिनि दिङा
दिङायाव गाखोनानै आं नुनो मोनदोंमोन आंनि सायखं
आरो अन्थाइयाव गसंनानै ना बोननाय आइजो -
बियो रावबो नङा नोंनो
नोंनि सावगारिखौ आं लाखिनानै दोनदों गोसोआव फैबाय थानायनि थाखाय

दिनैबो दोंसे खन्थाइ लिरहरो -
नोंनि गोजोनै थांनानै थानायनि थाखाय

नै अन्थाइयाव गसंनानै ना बोनबाय थानाय आइजो
बे दैमायानो नोंनो उदैनि उखैनाय होखारोबा
दैमायाव हाजार बिजार बायगर सम फैयोब्लाबो
दैमाया दा रानलांथों
मानोना गावनिल' नङा आंबादि गथ'नि उखैनाय गले गले होखारो नोङो

आं नोंखौ मोजां मोनबाय बेसेबांबा
मानोना आं नोंखौ मैगं फानग्रा आइनि महराव नुनो मोनो ।