आरो थांथारनांगोन आं सानो Poem by Ronjoy Brahma

बेसेबांबा बारहुंखा फैयो
बेसेबांबा मोसा जारौआ सोफै सोफै खालामफैयो
थांबावनांगौआबो दं बेसेबा गोजान -
आं नाथाय गावखौनो दाबो एसेबांसिम थि खालामनोबो हायाखिसै
थांबावनो ना बेवहायनो जिरायनानै थानो
आरो थांबावनो ना थाङालासेनो थानो ।

एखमबा साननाय फैयो गोसोआव
दैमा जानानै उजिनाय मोनबा साननांगौ जेबो गैयामोन
दाहारनि अन्थाइ जानायमोनबाबो दुद्रनानैनो
गोदान मोनसे सिनायथि जागौमोन;
ओरैबादि हालोदाव दा गोग्लैनानै दङदि
जे आं हाब्रां खुरखानो हायै बिलोनि थाइसे अन्थाइ जानानै थाबाय ।

बेसेबां गोजान थांबावनांगौ दं
दिनैनि साना आंनि सिखारनायनि सान
आं नाथाय सिखारनो हायाखै ।

सोफै सोफै होख्रावनाय रोजाबनाय
आंनि मेगन आरो खोमा दावहानि हांख्रायनाय
बेखायनो सिखारनांगोन -
दैमाबादि आरो थांथारनांगोन आं सानो ।