हरखाब दिनैनिल' नङा गोदोनिफ्राइनो Poem by Ronjoy Brahma

नोंनि थाखाय दैसायाव स्राय दुगैनानै
दाउब' फालो आरो फानखावरिया नखोरांआव बिरदावलाङो
आरो बिरबोफिनो गाथोनाव
इनायनो समायसिन होयो नोंनि हाइनारि मुस्रिखौ
दुब्लिनिफ्राइ न' फारसे आगान सुरबोनाय
मोसौ आरो बोरमा फालोआ हुरासे थासारिखौ रंजानायजों गोमसार होयो

दैसा जिङाव आरो अरनबारियाव
लामा-सामा आरो फैलाव दुब्लि गेजेराव
अखा बह्रा दैज्लां आरो खुवा खुनाय मेसें बोथोराव
दावबायनाय आरो जिरायनाय नोंखौ आं जेराव मेरावनो लोगो मोनबोदों
मोजां मोनदों बांसिननिफ्राइ बांसिन

नोंनि हाइनारि महर-मुस्रियाव हाजार हाजार सिमां नुयो आं
नोंनि अनसुलि बिखायाव गोबानानै
जिउनि बेसेबांबा गोजोननाय मोनो आं
नोंनि अनसुलि आखुआव

मोनाबिलि नोंखौ आं बांसिननिफ्राइ बांसिनसो
मोजां मोनसिननो हमबाय
मानसिफोरा बेखौ नंखाय बुंनो हागौ
बिसोर नेहाद दानदिसेनिल' होननानै बुंनो हागौ
नाथाय सयथि नोंखौ मोजां मोननाया
हरखाब दिनैनिल' नङा गोदोनिफ्राइनो