दावहानि बेसेबा गोजानावबो दावहा Poem by Ronjoy Brahma

दावहानि मोनामनाया खना खनला दाबोरफ्रोमबो गोसारजोबबाय
पेट्रल डिजेलनि दावराव दावसिखौ नेवसिगारनानै
आमाजान अरनबारियाव बोथिसे आदारजोंनो सान हगारहरनाय
जंगलियाफोराबो दिनै गुमुर मोनदों
दावहानि अगाले मोनामनाया बिसोरनि गन्थङावबो हब हब हाबदों

दावहानि खौराङा आंखौ गोजोननाय गैयै खालामो
दाबोरफ्रोमबो दावहानि अगाले खौरां
लोरबां दुब्ला खालामनाय
थैनाय आरो बुथारनाय

सिलाइ बारुदनि दावहाल' नङा
अनेक दावहानि खौरां आंनि खोमा गुदियाव
गादबनाय आरो फोजोबस्रांनाय
रांखान्थि आरो राजखान्थिनि
बाय बाहागिफोरनि

मिथिस्लाबै हाथियार आं गुमुर मोनबाय
मिनिहोनाय
रंजाहोनाय
बोथिसे थेब्रे आदार बेसेदि गिलुबालु

दावहा गिख' मानसि नङा आं
नाथाय सुखु आरो गोजोनखौ लुबैयो
बेखायनो दिनै आं दावहानि बेसेबा गोजानाव फैदों
थेवबो बारग'नो हाथारमाराखिसै आं
दावहा बेवहायबो
दावहा नाङाजासे ओरैनो गसंनो मोनाखिसै आं बे हायावबो