बेबादिनो समायना जायो Poem by Ronjoy Brahma

गासै दुखु दाहाजोंनो जोबलांनो दाहो सानखौ
जानो हागौ नों लामा आन्दायनानै दं बबेयावबा
जानो हागौ हाग्राबारियाव
नङाबा लामा गेजेराव
जानो हागौ नों जिउनि मलानदुबियाव
खेबसेब्लाबो मिनिस्लुनानै नाय
बेवहायबो गोजोननायखौ मोनगोन नोङो
माब्लाबा मोनसे मिनिस्लुनायजोंनो हरआ सोराङो

गोबाव समसिम अन्थाइ सिङावनो
अख्रां नुआ लामा नुआ जानानै
गाबखांबाय आं
आरो बिदै बहरा मिनिबाय

फैथों बारहुंखा सारअन्थाइ
सिरि फैथों बर'फ हाजार हाजार थुख्रा
गोसो जायोबा रंजायै रंजायैनो थांनो हायो गोजान लामा
हाबथों दाबोरफ्रोमबो मोदोमाव सु
मिनिनानैनो दिहुनना आहुति होनो हायो

देहायाव थानो हागौ सानाय आलौनाय
दानदिसे गांनाय आरो उखैनाय
माखौ गिनो
जिउआ बेबादिनो समायना जायो
जिउनि दावबायनाय दरसे बालाहामा बारनाय
दरसे हाजो गाखोनाय
मोनसे हाग्रामा बारनाय
मोनसे दैमा बारनायबादिल'सो