थोबसे मोदै नांगौ नोंनि Poem by Ronjoy Brahma

थोबसे मोदै नांगौ नोंनि

नोंथांआ दिनैसिम गाबफेरदों मा गाबाखै
एबा नोंथांआ गाबनो रोंगौ ना रोंआ
जोंहादि अलदखदआव दं
आरो जोंनि नखरनि अरदाब गंसेनि ओंखाम जाग्रा सोद्रोमाफोर

एमफि गोमाजाबाय दावहा गेजेराव
सुथुरा दावगाबोबावबाय अख्रां सोमावनानै
गांसे मोनथाइ लिरफबनाय फिरफिला थिखोदावनानै
नोंथांआ दानिया खारखोमानो ना खर'जों रोन नांबावनो
दिनै थोबसे मोदै नांगौ नोंनि
नोंथांआ जोंनि थाखाय गाबनांगोन
नोंथांआ जोंखौ अननांगोन जेरै जों नोंथांखौ अनो
फिन एमफि दैफिनबावनांगोन
नोंथांआ जोंखौ गोजोन होनांगोन
जोंनि मेगनाव बोहैनाय मोदैखौ आजावना नायनांगोन

नाथाय नोंथांआ दा मा सानखो
जोंखौ नागारनानै बिसोरजों सारेनदार जानोसै
एबा नोंथांआ दा बिसोरजों लोगो जानानै थानोसै?

थोबसे मोदै नांगौ नोंनि
नोंथांआ दिनै जोंजों गाबफानो नांगोन
जोंनि देहा आरो गोसोनि गांनाय उखैनाय आरो खुद्रिनायखौ
गोसो होनानै फरायनांगोन आरो बुजिनो नांथारगोन
जोंदि ओंखाम खबसेनि सिमां नुदों
जोंदि सिमांआव गंसे न' लुदों
सिमांखौ नोंथांआ खोनासंनांगोन