जोनोमा रमारि Poem by Ronjoy Brahma

गुदु अरन जाहारमोन सानसे
ओरैनो दंखायो बर'हा-
गायसनबाय गोदान रमारि मुंनि
आमटेकानि सिङाव गामि गंसे ।
आय'-
दुखु खस्ट
गाबनाय मिनिनाय
हाल खदालजोँ जाबोबाय संसार
बोसोरनि उनाव बोसोर
गामिनि रायजो रायजाफ्रा
दुखु खस्ट थेवबो खुसि
जोनोम जाबाय सानसे
आंनि
आबादारि लहेन सुमिथ्रानि
गोरबोआव ।
नुबाय आं थै मोनसेनि
जारौ मारौ सानै बिब'
मुङा सनजिमा रनजिमा
आरोबाव
नुबाय आं जोनोम रमारि
आय' बोदोर फाखनाव
रंजानाय खुसि
आय आफाया ।
गामिया जालांबाय समायना
फैयो नायनो बयबो देलायै
आय' उजिबाय आथुमसे फरायसा
रमारिया गुस्लायबाय
सानसे समाव जोनोम
फंबाय प्रेमानि मिनिस्लु ।
आय' आं गाबखांदोँ दिनै
खोमसि हराव इनाय बानाय
सोँनाय गैयै गावथार जानाय
गामिनि गोरा जाथि मुंनि
आदैखौ
जाय बिथाङा गामिखौ
समाय होदोँ
जाय आदैया गामिखौ
फोसावदोँ ।
गैया दिनैबो मोनाखै आं
आदैनि थैनाय फोजोबस्रांनाय
जाया गोमालांबाय
बोदोर आं मोननो
फिन्नाय ।
दिनै आं हास्थायदोँ
जांख्रिखाङै गोजोन
जाय उजिदोँ फरायसा
जाय सिनायदोँ हांखो
बिथांमोनखौ लानानै
जाय गामियाव जोनोम
समाय होनो बेखौ
सिनायथि होनो गोगो
गोदान गोथार
सानस्रि गोरबोआव
सोमजि होनो ।