दावबायारि आं Poem by Ronjoy Brahma

दावबायारि आं

दावबायारि आं-
हानाय नङा आंखौ रावबो
होबथाना दोननो
गोथौ हाखर
बेमा सोँनाय लामा
नंखाय बे गासिबो नंखाय
गेवगोन गासिबो लामानि
दरजा
थांगोन आं बारलांगोन
बुरलुंबुथुर ।
दावबायारि आं-
होख्रावो आं सोर गसंथेदोँ
लामायाव
हगाराब्ला लामा एरना
आंनो
बारलांगोन आं खर' साजोँ
गाखोना ।
मोजां-गाज्रि मोन्नै
लामाया गेवगोन
सायखना थांगोन मोनसेल'
लामा
मोजां होननायजोँ ।
दावबायारि आं-
दावबायबाय आगानसे
हाद्रिनि बुहुमाव
थांगोन गोजान सिमा गैया
थाद'आ आं जिराया दान्दिसे
जोबलाङाब्ला मोजोमसे
सोलेर ।
होगोन दान्दिसे जिरायनो
बिबार बारि समायना
' थाद' जिरायलां दान्दिसे गोजोन'
नाथाय आं थाद'आ
आं जिराया
साना हाबनोसै
गोमालांनोसै जारां सान
आं थांगोन
थांथारगोन आं
दावबायारि आं.. ।

Thursday, July 17, 2014
Topic(s) of this poem: Poem
COMMENTS OF THE POEM
READ THIS POEM IN OTHER LANGUAGES
Ronjoy Brahma

Ronjoy Brahma

Amteka (Chirang) /Assam, India
Close
Error Success