गोरबोनि हास्थायनाय Poem by Ronjoy Brahma

नाङा आंनो अलखद समाव
मोदै हुगारना थानो फालि गांसे
बोहै लांथोँ गोगो सुदेम
लोगो लाहैथोँ गुबुंले बुरलुंबुथुरआव
गेसाव गोफोन जानानै बेमाराव गोग्लैनाय
ना खासेवफोरा रैखा मोन्थोँ।
नाङा आंनो गुबुंले खैदां समाव
गोलाव आथिँ सुबुंखौ नायगार लांनो
दाजाथोँ गोसोआ आंनि फाख्नाखं दामनाय
हाथोँ आं फंसे आर'ज सुबुंनो-
आय'...!
दा लुबैथोँ आं जेब्लाबो
उन्दुनो कम्बु करणनि लेब गांसे
मोन्थोँ आं गांसेल' गान्दु खान्दासे
गोरबोनि सानस्रिजोँ राहा नागिरनाय,
सानस्रि लैथोनि दाहाराव
गोगो गोहोजोँ देरहासारनाय।
थिँ-थिँ दुंहाबनाय गोलोम समाव
दा लुबैथोँ आं गोनोखोनि ए.सि. सुहाब
मोन्थोँ आं हान्थियाव गेरेमसा
मैखोम समायना बिफां फांसेल',
नाङाथोँ आं गोजोन होनो गोसो
बलिउट्-हलिउट् केसेठनि खुगा सिब्लांबाय
मोन्थोँ आं बिफांनि दालाइयाव
जेखाइ थुनिया दाउनि मुसुरनाय।
दाजाथोँ आंनि गोरबो सानस्रिया
थाबथाना थानाय गेसेव खेसेरनि-
सिमब्रे सिमब्रे जावरिथोँ जोमैजोँ,
गोगो गोहोजोँ स'हैथोँ आं बै-
जोहोलाव हिमालय आरो एभारेष्टनि
देरहासद खर' थिखिनियाव।
आरोबाव आं-
गोथार गोरबोजोँ मुलुगाव
बिखा फोर्दानै सौफैथोँ अखा महराव।
दाजाथोँ आं गोरान हाद्रि बिरहोनाय
हाथोँ आं गोथौ सानस्रिजोँ
अखा महरै सिदोमा खालामनाय,
हाथोँ आं हमदांनो आबादारि
एम्बु आरो गोरान बिफां गोबां
गोगो अखाजोँ सुग्लायनो।
बै फाग्ला दिङा आरो
फाग्ला दैमा गाथोनखौ
हाथोँ आं दबथायनो
जाहाथे जाया लोमला बुसाव
आबादारिनि जाया जेबो खहा।
हाथोँ आं गोसो हमथानो
सिबला सिबला बार-सार अन्थाइ-बाना,
बेखौल' आं हाथोँ
मैला जानाय संसाराव
हगारनो बार-दै-सिख्ला
फोजोबस्रांनो गोजाम खान्थै।