खोनादोँ आं Poem by Ronjoy Brahma

सोर होस्रिख्रावदोँ-
लामायाव हांमा लानानै?
सोर होस्रिख्रावदोँ-
बिमानि दुखुआव
मोदै लानानै! ..?
नोँ-थां-हा-सो गुबै
बिर जोहोलावआ ।
हानाय मानि बिमानि गसरनाय मोदैखौ
आजावना सनानि गहेना
बानायनो जिनज्रि ।
खोनादोँ आं हायेनाव-
बोहैलांनाय हाजोनि बर'फआ लाथा खानाय,
खोनादोँ आं बर'सानि
मोदैआ लैथो बिलोमानि महर-
नाथाय-
खोनादोँ आं-
बर'सानि गलंनाय थैनि बिलोआव
लेवार बेलावनि गोजोमनाय ।
खोनासं खोनासं जोहोलाव-जोहोलावजो-
आंनि मोन्दांनाय गोरबोनि-
हागोन नामा नोँ गोजोनै
नायना थानो?
संख्रि हो बाब्राबथोँ-
बाब्राबथोँ आनज्राय लांथोँ
थै सोबग्रा दंनायमानि सुथुर ।