थैनाव थैनाव Poem by Ronjoy Brahma

हां बोस्रानायनि समा फैखागोन
बराय बराय सोरबाया लांगोन
आर'ज गाबसै बिनि थाखाय
गोजोन आंनो गोजोन सोर्गोआव ।
दान्दिसे गेलेनायनि समा थुंगेगोन
नुलायनाय मायाबि मि- सुबुंजोँ
बावनाय जानाय नङा अरायनि
सोर्गोआव नुथारगोन आं सावगारि
लिरफबनाय जोमैयाव मुंफोरखौ ।
सिनायलायनाय मिथिँगाजोँ
लोगो हमनाय दैमा- लैथोजोँ
गुबुन नंथारा महरनि बैसोमाथाजोँ
नागारलांगोन नंथारगौ सानसेदि ।
जोमै मोफ्लामो मिनियाव
रंजा रंजा बाज्रुमो अखाया
गेलेगोन हाखराव हाब्रुजोँ
मिनिगोन रंजाना गोरबोआव
मोसागोन आं गोबाना आय
बिखायाव बैसोमाथानि गोरबोआव
बाब्राब बाब्राब गाबगोन आं
रंजा रंजा थांगोन अखाजोँ रायजोआव ।
थैनाव थैनाव बुंगोन आं
'आरोबाव बिदायसै आयै'
गोजानाव आं थांसिगोन जेबोला
नाथाय नायगोन आं जेब्लाबो
बिरबाय बिरबाय जोमैजोँ ।
मि- सुबुंजोँ बुंनाय थंसेयाव
आर'जखौ गाबगोन सोर्गोआव
फारागखौ दाहोथोँ सानसेयाव
आलो आलो रंजा हो गोजोनै ।