अराय मुगा खोमसि खोमसि
बे गादबजानाय, बे सुसिजानायखौ
दिनै आरो गाबोन सहायनो हालिया,
फरायजायै खोमसियाव थानो हालिया।
बनजार दैखांदो गादब जानाय फोरजाफोर
बे गादबग्रा, बे सुसिगिरिजोँ जुजिदो
ब्लाव ब्लाव दुंनाय अर बिखायाव लानानै-
खोमसिनि जालामाखौ दिनैनो बोखावदो।
उदांस्रिया हब्रादोँ आयदै आयदै होन्नानै
अन्थाइ बिखा खुंगुरिनि आथिँ सिङाव,
मोनजारोङैनि गाबनायखौ फोजावदोँ जोमैजोँ
मोनजारोङैनि बिखाया खामग्लिदोँ दाहायाव।
रोजाबदो आंनि हे बिग्रायखांगिरि मोन्थाइनि
बेसेबा दाहार सिमना सिफायनायनि
उदांस्रिखौ फसंनि मोन्थाइनि बिन्दोआव
गोजोन गायसननो अराय थांनानै थानायाव।
अराय मुगा खोमसि खोमसि
बेसेबा गाबनांनाय, बेसेबा हांमा सुरनाय
जोबनो रोङै दुखुथियानि मोदै गसरनाय
खोमसिखौ होखारनो बनजार दैखांदो।
गादबजाग्रा बे सोबखग्रानि हेँथायै
खुंगुरि बे सुसिगिरिनि बिखा खामफ्लंनो
रोजाब जारिमिननि मेथाइ मोन्थाइनि
रोजाब ब्लाव ब्लाव अर लानानै।
This poem has not been translated into any other language yet.
I would like to translate this poem