हर जाबाय Poem by Ronjoy Brahma

गामिनि बाला सेरेब लामा
खोल खोल जोँख्लाबदोँ जोँमानि सोरांआव ।
गामिनि गासैबो स्रिँ-स्र जाबाय
गोदो गोदो एमाव उन्दुबाय,
लामा सेरनि मोसौ गलियाव
मोसौनि गांसो सावलेनाय सोदोब
बेनिफ्राय आरो सिरि ।
सफा लामायाव थिँ थिँ गोमोथिँ
खुसेँग्राफ्रा मोसाग्लांदोँ
माफा मानै गुमाफ्राबो
निन रानि बरायनो सिगां
रंजाग्लांदोँसै मेथाइजोँ ।
हाजोनि निजोरा बोहैनाय दै
लामा बायफ्लंना जिरिनाय,
थाबायै गासोमदोँ आं आयथिँजोँ
गुसु सुहाबनाय मोन्दोँ बिगुराव ।
जोँमानि मिनि हादे मोखाङै
सोमखोर गेरेमसा बिफांआ लामायाव
खोमसि सायखं गोग्लैदोँ
गोरबोआव गिखांनाय गुदुं देहा
हथात् मोनखांदोँ मेवखांनाय ।
दान्दिसे उनाव आरोबाव-
गामिनि सैमाफोरा हब्रादोँ
मिथिनो मोना जायो गोरबोआ,
गोजां बोथोरनि रादाब
ना..?
सोरजिनाव दान्दिसे आर'ज ।।