फोरमायनाय सिमान Poem by Ronjoy Brahma

1
आं बर'नि अरन सिलाखौ सनाखै
सनखांबाय गेदेमा माब्लाबानो ।
2
हाराव हाथाव रजंखौ आं जावाखै
जावखांबाय गेदेमा माब्लाबानो ।
3
गंफा गंनै रजंखौ आं बुखुवाखै
खनसायना गारहरनोसो नाजादोँ ।
4
आं सिलानि दाखोरखौ सिबाखै
सिबखांबाय गेदेमा माब्लाबानो ।
5
थाबावनाय सिलानि दाखोरखौ
आं नागिरदोँ
लोरबां देहा लानानै ।
6
बर'नि फोथाराव आं आबाद मावाखै
फोलांबाय आबादारिया माब्लाबानो ।
00000
7
आं फुलि गुरै जोलैनि
खिलि गोदान हा सौसिनाय ।
8
आं जायाखै मैखोम गेरेमसा
गुमा एम्फौजोँ नेवसि जानाय ।
9
बिषनि हासारजोँ थमेन्नाय आं
मिनिस्लु दासो बिलाइ गांनै ।
10
गोरान सिलायाव रोदा आंनि
गोरान हाद्रिया बारजोँ गाग्लोबो ।
11
सहायनो नाजायो आं हाद्रिखौ
आरोबाव
अखा दामब्राया बुग्लेम फैयो ।
12
दुखुनि उनावबो आरो गाग्लोबो
दाउ एम्फौफोरा खेबख्लाब फैयो
लंथं आंनि साजायनाय खालामो ।
13
गोरान सिलायाव जिरायना नायहरो आं
दाखा दाखा जोमैखौ
बिसोरबो हेव नेवसि लाङो ।
14
सोरनिबा न' हास्थायो आं गंसे
बेवनो आजोरोम दान्दिसे गोजोन्नो ।
15
लोरबां आंनि गासैबो लोरबां
दानो रंजानाय, दानो गाबनांनाय ।
16
गेरेमसा जागोन आं
अन्नाय मोनोब्ला ।
17
सोमखोर जागोन आं
हास्थायनाय जाफुंब्ला ।
18
नांगौ आंनो नांगौ
अन्नाय, हास्थायनाय,
सुफुंनाय फिन्नाय ।
19
आं फुलि गोरान सिलानि
नाथाय गायज्रेब गोरलै जोलै ।
20
आं थमेन्नाय गोरलै फुलि
नाथाय बिष हासारनि बिखाव ।
21
नांगौ-
दै
बिदुं
हासार,
आरो
नांगौ-
देरा
बेरा गंसे,
जेरैबायदि आं देरगोन
गोजोन गुसु बारजोँ ।