हमस' हरनो हायै समनिफ्राइ
आयनि अननाया बेसेदि...
दिनै-
आंनि गोरबोआव आरोबाव
रोमै रोमै फैयो रंजानाय,
आयखौ आं गोसो खाङो...
आयै आयै आयै आयै
मानो गाबज्रियामोन-
गेलेना मेँनाय समाव
आरो दुखु गाबनाय समाव ।
दिनै सावगारि आयै
नोँनि खुदुमनाय बामखांनाय
आंनि गासैबो गोसो
आरोबाव
गोरबो मेगनआव जाखाङो ।
आं गोसो खाङो आयै
आरोबाव
सल्ता गुसुं बाथिनि सोरांआव
नोँ आंखौ दान्दिसे
गिजि थयलायाव फजना
जाया जाया आसि थुनायखौ ।
आरोबाव-
आयै आं गोरबोआव
दिनै
नोँनि हास्थायो मिनिनाय,
गोजोँ रंजानाय गोरबोआव
जिउनि मोनसे रंजानायखौ ।
उन्दुगादुरा जानो हमदोँ आयै
बुस्रोद बुस्रोद फोजाफै माबारै
नोँनि फिसा आंखौ फोजाफै ।
This poem has not been translated into any other language yet.
I would like to translate this poem