नोँथांआ गोसोखांजाथाव Poem by Ronjoy Brahma

बे रोखोमनि गोखासिन दाहा
बिसोनिफ्रायबो गोखासिन
जिउमानिफ्रायबो गोथौसिन
बेबादिनो गोथौ रोदाफोर
लेवा हारिनि बिसोबादि
लोरबांथिनिफ्राय दाहार लाबोनाय।
अनसुला जाग्रोनांगोन सिगां
बेखौ नोँनि थैनाय बिफायानो
आंनो फोरोँलांदोँमोन।
बे जिउआ गोजावना थानाय उन्दै बन्थ
गोथै लैथोमानि बिखायाव,
बे थैनाया जेबो नङा नाथाय
थैनांगौनि जोबथा थैनाय।
दाहानि थुंगेनाय बियो
मुं गैयै बिदेसिनि थैनाय
फोलानाय आखायनि जोबथा फोलावनाय।
नखल जिउनि थांना थानाय
थांना थानांगौ गैयालासे
समायना गैयै फोथायनायनि थुंगेनाय।
माबोरै हमदांनो हानो आं
बेखौ नोँथांआ बाराबाव सहायनो हानाय नङा,
आं माबोरै सानसनो हानो बेखौ?
नोँथांआ गोबाव थांनानै थालिया!
जुदि दुखुफोरा गैलिया नोँ थियैनो था।