जेबो गियान गैया Poem by Ronjoy Brahma

जेबो गियान गैया
मा होन्ना बुंगोन;
जेबो गोहो गैया
मादि आं मावगोन;
नाथाय मुलुगाव गसंनाय
सासे आंबो सुबुं
आं एरसोनाय नङा,
आं मिथिगौ आं सुबुं
सानस्रि सोरजिग्रा जाथ सासे
आं दावबायनो हागौ जोमैजोँ
मोसानो हागौ बारजोँ बिरनानै
गोरोबनो हागौ मिथिँगाजोँ।
माब्लाबा थांनो लुबैयो सोरजिनि
बेयो होथेनाय सनानि
अब्लाबो आं नायनो लुबैयो
मैखि खाथेनाय मेगनाव,
आं खोनासंनो लुबैयो
बेयो सोगोमो सार अन्थाइ
हां गुदुं खोमा फारनैआव,
सोरजिनि गोदै फिथाइ
आं लुबैयो जानो
नाथाय खुगाया आंनि माथेनाय,
आं थाबायो गिदिँ गिदिँ
थोँनै आंनि आथिँजोँ,
समायना बिबार मोनहैब्ला
लुबैयो आं मोनामसुनो
नाथाय गुंखि खाथेनाय
माब्लाबा मोनहाबनाय गगा
बेनो दावहा बुहुमनि जिउजोँ
जाय दावहानि थाथिर गैया
आरोबाव आं -
आं लुबैयो मोजां मोन्नो
बेरायनो
मिथिँगानि
बोथोर
बोथोर
साजायना ।