रेल लामाआव दानदिसे Poem by Ronjoy Brahma

मार्मि बिबारआ दिनै आंखौ गिलुबालु गगा मोनहोबाय
बे बारआव रेलगारि लामाआवनो गेलेनो थांनांगौ जाबाय
दावबायारिफोरनि मोखां नायहर नायहर मिनिज्लायनांगोन
मार्मि बिबारबादिनो मोनाबिलि समाव नआव फैफिननो सानबाय

साथ भाइनि दुइसिन फंबाय आं; बुंनांगौब्ला दाउसा जुब्रा
सिला जानायमोनब्ला बिरलांगौमोन आं हाजोनि हरै फोथाराव
गुदु जाहारनि झरना गाथोनआव अनजालि नोंखौ नुनानै
जारला जालायबाय आंहा दानिया हाइ उसाव-बादाव

नोंखौ नायो आं बारआव गोबाथाबनानै उरायै उरायै
आरोबाव माथो बुंबावगोन अन्थाइसो आंदि रेल लामानि
लामा सेराव रोदोमनाय नों जेन खोमथा थाइलिर बिफां
दिरुंजों खाख्रबजानाय आं बयनिबो नेहादसिन मासे मैदेर

साननायबादि मिजिं सुफुं जाया होंगो-दोंगो हादोरआव
गोजान बेसेबा दुद्रुबोबाय आं अन्थाइ महरै गाब गानानै
अखाफोरनिफ्राइ माखन लानानै फैनो हाजारसे बांसिन सानो
नाथाय लंथं दाउ बांबुला आंदि माब्ला गां रज'बावगोन?

थेवबो आं फोथायो; आंनि आलादा गाबनि खानाय दोंसेखौ लानानैबो
मोनसे समाव गोलाव मोनसे दैमाबादि जारिमिन जागोन
रेल लामाआव साननि मेगना खारनानै आंखौ लोगो मोनफैयो
बिखुं लामनानै होयो आं गिनाय आर गोजांनाय खारलांथों होननानै

बिखानि खसाब दानिया हाथाइआव बायनानै मोनसै
आरोबाव गोसोनि खसाब गावनो बानायनांगौ जाबाय दानिया
नोंखौ गोसो थोनानै गोजोनै थागोन आं समखौ नेनानै
मुलुग नोंखौ अरायबो बोजबनो सानो आं थै-मोदोमजों