नों जोंखौ थगायाखै Poem by Ronjoy Brahma

जोंनि गामियाव दाबो सोरांनाय गैया
साना उल्था गिदिंलांफिनबाय
नों रोजाबनाय मेथाइआ
गथ' बुरखायनाय मेथाइसोमोन खोमा......!

नोंनि मेथाइआव जों बाज्लखांदोंमोन
सानथारबायमोन
साना ओंखार बोमारबाय!

नाथाय आरो मा बुंबावनो जोहोलाव?
नों सान ओंखारबोनाय नुनायबादिनो
आगोल सोरबा नुदोंमोन बर'नि रेजिमेन्ट
मेच मानसिफोरनि रायजो

उनहालागै उदयाचल
बर'लेण्ड

बयबो सिमांखौ नुयो नाथाय
सिमांखौ बांसिनानो बावलांफिनो।

सानफ्रोमबोनि जानाय आदार गोदान गोदान सवाद-रोसि
गोसोआव लानो गोनांथियानो गैया!
बेखायनो गोदान गोदान रोसि जोंनो नांगौ

मुगानि उनाव मुगा बेसेबांदि दाबि
ओजों हजों लंथं थानो मोननायनिबो दाबि सिखारबाय
होस्रिख्रावनाय
लासिंसिं लासिंसिं

नों नाथाय जाय बाथ्राखौ आसि थुनानै बुंदोंमोन
बे बाथ्राया दाबो रेकर्डिं जानानै दं
थेवबो जों खोनासंनो खहाबलिया
गोदान गोदान मेथाइ फैबाय

नों बुंनाया नाथाय सैथोमोन जोहोलाव
जाय सानखौ नों नुहरदोंमोन बे सानआ फैमारदोंमोन
नाथाय गिदिंलांफिनबाय!

जों दा खोमसियाव
दाउमासार गावनो खुरिया खुरिया
नआवनि दाउखौनो ग्रेव होनलायनाय गावबाय जों

नों हांख्रायनायबादि
बिलो मोनसेयावनो थालायनो हानायबो जायाखिसै!