जोमै नुवाखै नोङो Poem by Ronjoy Brahma

ओइ रामोन्दा
जोमै नुवाखै नोङो- जोमै?
बैसोमुथिनि गावनाय बिखाखौ सुथेनो
जोमैया अखाखौ थिनहरगोन माब्ला?
बिजि खान्दानि गोनां जायोब्ला आबैआ बुंलांदोँमोन
फुर्णिमानि मोखां नायनानै आर'ज गाबनो
ओइ रामोन्दा
जोमै नुवाखै नोङो- जोमै?
अरगेँ हाजोनि गोथौ सिं थालायाव
सुनै लाथाया गोदौनायबादि
आंनि गथाय देहा-सोलेराव गोदौदोँ
गोलोमदैनि गथा दुलुर गोगो फिथर।
जोमैखौ खामग्लिनानै नोरोकआव दोनहरदोँ सान
दुलाराइ मिथिँगानि सोलेरा एखेबारे रानज्रब,
दाउसिनल' नङा बिफांखौ मा बुंनो?
लाथिख'आव जोमै नागिर नागिर
बालाहामाल' नङा दैमा-दैसानि बाला रिफि
ज्लिउ ज्लिउ जोँदोँ अन्थाइ सेरेफनि मेगन।
ओइ रामोन्दा
जोमै नुवाखै नोङो- जोमै?
खदाल नागारना बिफां सायाआव जिरायनायाव
गावनिनो फारनै खोमाजोँ खोनादोँ आं
जेसेबां फानफेवालि दाउ गाबदोँ एसेबांनो गावरेमा।