बुंबाय जिउआव गेलेनाय Poem by Ronjoy Brahma

बुंबाय जिउआव गेलेनाय
बुंबाय गोसोआव मोजां मोन्नाय
सिमां सिमां गासैबो सिमांनि।
बेयो आंनि जिउ,
बेयो सोलायबाय
आं सेँग्रा,
जाम्बा नङा माबा मोनसे
गेलेनाय मोजां मोन्नाय।
आथोनारि सिख्लानि ख्लाब ख्लाब
गासैबो गोरबोनि जिरिनाय थै,
नंखाय नङा सान्नायनि बिसुखे गोरोबब्ला
सुज्राय सु बाफबनाय देहा मोदोम।
बिसोरो लेँहरो बैसोखौ
गिदिँ गिदिँ लामायाव मेँग्लियो,
माब्लाबा लान्थिया हाखराव गोग्लैयो
अब्ला बिनि उनाव,
गोसोआ गोरा जायो।
साबुगआ बिसोरखौ अख्रायै बामख्रबो।
रिँखाङाखै खुगायाव नोँ आंनि
खोबथेना दोनदोँ सोलेरनि बाब्राबनाय।
अ' जाबाय आंनि जाफुंनाय
ओँखारबोयो गोसोनि सान गोरलैया
आंनि उन्दुनाय फोजाना।
गाहाम समखौ मोनफिनाखै
जाफुंनाय जाफुङै फैसालि हाब्रांनि,
आं बुङो नोँनि बिखानि-
गोदै गैया नोँनि बादि सिनि,
आबुं जायो सोलेरा आंनि
गासैबो सान्नायनि मेटामेटाक्स्जोँ।
नागिरबायनाय सिग्रोम सिग्रोम सोलेर
गोबानो बिखाव अरथाब अरथाब,
लाथिख' हिसाबा अब्ला।
दुलुर हाखर जांख्लाल' गैया
गोग्लैलाङो बेसेबा गोथौ
बिलाद लाथा संसाराव।
आय' सिमां बे सिमां
बुंबाय जिउआव गेलेनाय
गोलोमदै गारना थै-
सोरजिबानाय लाथिख' मायनासनि।