गासैबो फैमालसो हाबिलानि? ? Poem by Ronjoy Brahma

मैयासो रैसुमैया आंखौ बुंदोँ-
बांद्राय समखौ नोङो हलाय हरबाय,
आंथ' मिथिया नङा
नोँदि आंखौ हास्थाय खोमायो
बेसेदि नोङो मोजां मोनखोमायो
अब्ला आङो फिन्नाय होनो बोरै?
नाथाय आंबो नोँखौ माब्लाबानिफ्राय
सिरि सिरि सानखोमायो
नोङो जेरै आंबो एरैनो
नाथाय नोँसो बांसिन
ना आंसो बांसिन लाजिदोँ?
फारसे सोरां नांनाय गोसोआव
अम्बासि रिफिहरो गोरबोआव
जोँब्लावनाय सानसुनि मेगनाव
दोबैलांनाय साननि सायखं नाङो
आफायाबो दिनैसो बुंबाय-
बैसो जाबाय बोथोराबो फैबाय
जुलिनि थाखाय गासैबो जाखाबाय
नोँ बिमाफानि बोसोन फालिग्रा गथ'
हागुंफारायाव नोँनि लाइगोन सैनाय।
अह'...! खर'आव मेलेमा बारसावो
दह'लाफारा फारसे आगान होयो आं-
बि ए खौ उथ्रिबाय
एम ए खौ आरोबाव हायाखिसै
बांबुला फोरोँगिरिया थियारि
गावनि एकादेमी फाइब्रेट स्कुलाव
दानफायाव नैरोजा दरमाहा होनो,
बेँगालराव जिरोजा मोनो नो
मेलेमाव ग्रोब गोजाव फैगारदोँ।
नै बोसोर रैसुमैनो रादाय होबाय
आफाया आंखौ गोबाव जालिया
नाथाय आयआ?
आयआबो आंनि आथिँ हमनो राजि
सिनस्रि बायनायसो दिन्थिथारबाय।
अह'...! आबगारिनि गलायाव
हेब्रे हेब्रे सानस्रिखौ जथुमनानै
मोनफायै बिजिरदोँ आं
आंनि मोजां मोन्नायादि
गोरोबनाय गैयै खबामनिसो
ना जोदोबनाय गोनां हास्थायनायसो
एबा गलिनो रोङै मोदैसो?
फैमालदि गासैबो आंनि
साजायदों थांनोसो थियारि।