दरंगिरियाव खेबसे Poem by Ronjoy Brahma

1थि
फुंनि गुसु बार बिलिरनायाव
गोजाव फैदोँ फुंनि मेथाइया
गोसो गोजोनग्लायना सिरियै
रायदाव हरो आं अबंखौ
सानजा फैसालियाव मिनिस्लुनाय
खुलुम हरदोँ आं जोँमाखौ।
देहायाव गुसु बिलिरनाय बारा
मोसाग्लाङो आंनि मेगनाव।
2थि
फुंनि यज्ञखौ फोजोबनानै
गोसो रंजानायजोँ बेरायग्लाङो
सोमखोर महर लानाय लबरनि
गोथां बिलाइजोँ साग्लोबनाय बिफांआ
उन्दै दखरसे साग्लोबदोँ हाजोखौ,
समायना समायना गसंनाय
सोमखोर बागानाव नायग्लाङो सावगारिखौ
समनि दिन्थिखौ फोथांनो
मिनिस्लु साजायो महरै सावगारि।
3थि
गोरबोआव गोदान
मिथिँगानि महरा
बादिँग्लायदोँ थाथिरै गोसोआ
मेलनि सेर सेर
बेरायग्लांदोँ रंजानायजोँ;
थिला हाजोनि अन्थाइ थाफा
बोयो गोसोखौ मानोबा
सावगारिनि जथाय साजायो।
4थि
गोबां गोरबोआव एवथुयो-
बेरायग्लांनो साजायो गावखौ,
फुंनि जागायनायनिफ्राय आरो
यज्ञनि मेलखौ फोजोबो।
सोमखोर हाजोनि थिखिनि
गाखोना नायो हाजोनि सारि
गोरबोआव बेयो दिनै गोदान
नायहरो फैलाव हादाबखौ।