दैज्लांनि मोनसे सावगारि Poem by Ronjoy Brahma

बहानिफ्रायबा ग' ग' गगलिँग'.....
सेरजा दामै दामै हादि दग्लाया
दुखुथिया सुमलि बिफांआव बाफैयो।
फ्रि फ्रि सैमा सियालनि हाबासो?
गोसो होसारदोँ अखाया मोसानो,
सावलुन बुदांआ हाल एवदोँ
साखाथि फाखाथि दाउस्रिफोरा
जे जे जाजाय रंजादोँ;
आदार दौलायदोँ, खुदुमलायदोँ बायदि
सनास्रिया दखना बोखोस्रोयै
जब' जब' खर'आव थफ्ला-
मोदोमफ्रु गांजेमा बाथोनजोँ ओँखामनि।
एम्बुफोरा जब' जब' बारदोँ
बहाबा थांनांगौसो दं-
फैलाव दुब्लि, नायनो गोनां
हालेवनाय, आलिखोनाय
माय गायनाय, खोथिया फुनाय
बहाबा खना खनायाव
लेवारफोरा आज्लंबायदोँ
मोस्रोम, ससमाफोरा आलाय सिलाय
खानस्रि, एम्फौफोरा आलाय सिलाय
दै दै जेरैबो दै।
सम सम मिनिसुलुदोँ
हुरागासे गोमोहाबदोँ
बेबादिनो थेनथौफ्रांदोँ
गोबां दुखुआ साबफादोँ
दान्दिसे उनाव थांफिनदोँ
बहा थांगोन मिथिया-
ग' ग' गगलिँग'.....
दुखु गोनां गदां खुज्रा।