आंनि दुखुआ बांबाय Poem by Ronjoy Brahma

गेलेनाय बेरायनायानो आंनि हुदामोन
मिनिनाय रंजानायानो आंनि जिउमोन
नंगौ बिदिन्थाया साफ्रेखनो
बियो उल्टां-फाल्टां खालामो।
आङो सोलोङै सोलोङै रोँबाय
मानबायै मानबायै खारनोबो हाबाय
नुहरो आं रिउ रिउ गोजानाव-
हेँथा-हेँथि इनाय अनागार जेराव
हाजो हाजो लैथो लैथो
अरन अरन बारलांनानै
दाबसे समायना गामि;
जेराव गुसु सुदेम गोजोन
थमेन थमेन बिबार आलो गोजोन
रानज्रिँनाय मुरुनायनि सायखं गैया।
दिनै नैबे दुखुनि आफादसालि
जिउ सोलेरनि बिजिरसालि
थेनथौनाय गैयै सान्दोँ आरो सान्दोँ-
आङो देरहागोन आङो देरहागोन
मुलुग मिथिँगाखौ
लैथो अखोरांखौ
गोबायै गोबायै जिउ जिबिखौ
अर बार सोलेरखौ बुंगोन
नोँ आं, आंनो नोँ
जोँ थांनानै थागोन जुगे जुगे
नोँ गाबबा आं गाबनानै
आं मिनिब्ला नोँ मिनिनानै
हे परम ब्रह्मनि अराय
मानिजाथाव अनजाथाव जानानै।
हे गसाइ! ब्रह्म गिरि
दुखुनि थाखाय गाबनाय
गोजोननि थाखाय मिनिनाय
हो बुजिनायखौ मानि बेलाइ
बेसे समायना आमाय जुमाय
जुगे जुगे अराय गेलेनाय।