आय'मान सक्तिमाननि उनाव
थामथि सुबुंसाइ आं बिरदोँमोन,
गान्दौला राजाया आंखौ होसोगारदोँमोन;
हिमालय एभारेष्टनि थिखिनियाव आङो
बाद' बाद' आयथिँ जोकथोँबायदोँमोन।
मेगन साफ्रेगासे बुरलुंबुथुर
गांखं फिदिँगासेनो एन्टारटिका
चीन, मालाइ, एसिया, एउरपा
जथाइ हादरखौ बारलांगारदोँमोन,
मानासनि गान्दा जिराप
गोमालांनाय दाइनासुरास्, किँग कंग
बार्ली, जुरासिक गासैखौबो नुदोँ,
गोजाम स्यामुकनि हाजोआव
बोराय हनुमानखौ लोगो मोन्दोँ।
बिरगासिनो बिरगासिनो बिरो
फारि फारि नायगासिनो नायो
आंनि मेगना खोल खोल जोँदोँमोन
जेराव मोस्रोम मासे थाखोमानो हाया।
दोनसिरि सनासिरि दुनालि दैसानि
बालाखावा थेँगोना फिथिख्रि बेँसि
जारा जाम्बिजी गोमो लैथोनि
गोलेर खासेव खावै रौखौ
रोखा रोखा नुथारदोँ आं।
नुदोँ गासैखौबो रोखा रोखा
हाग्रामा गौरां दैसायाव फिकनिक जानाय,
आरो नुदोँ आं गेबेँङै
गंगा जुमुनायाव थब्ल'नाय।
जम राजानि बार्डेयाव रंजानानै
ओँखारबोदोँ आं एडेन बागानसिम,
कुरुक्षेत्रनि दावहाथिलिखौ गिदिँना
लन्डननि वेर्ष्टेनमेयारसिम थांदोँ,
बहा जागायामोन बबेनिफ्राय बड'लेण्डनि दावहाया
गुरुदेब बड'फानि आगाना बहा बहा।
बिरै बिरै लोथो मेँग्लिब्ला
हिमालयनि सेरफांआव जिरायो आं
गरदसे जौ असुरफोरा होफैयो,
सिउ सिउ बारनिफ्राय गोख्रैसिन बिरो आं।
गान्दौला राजाया आंखौ मोनहां मोनहां
आंनि गांखंआव हमहां हमहां
बोरैबा आं उनथिँ नायहरफ्लांदोँमोन
आङो बख्रबाव गोग्लैयो
आं गिदोँमोन खुगा ब्लां सिनाय
गोलेर दानबनि खुगाखौ
बिसोरो आंखौ खोमा गन्थं आथिँ.....
सानो मेगन मेसेबना;
आंनि गोलेरनि खुगायाव.....।
हरखाब आं सिरि मोनो
दिन्दां जाना दं मुस्रियाव नांथानानै
गोग्लैहां गोग्लैहां सौखि लोबोराव
जानांगौ आद्रा सिमाङाव
गान्दौला राजाया आंखौ हमथा थारदोँमोन।
This poem has not been translated into any other language yet.
I would like to translate this poem