फिसाला सानै फिसाजो सासे
बाजैनि बैसोआ दा ब्रैजिसे,
फियार लाभली जन्सन बीबी
बाजैया दासान्दि देलायनायाव हीबी,
जेखि बुङा जेखि सोँखारिया
बाजैया नाथाय खेरखेराया।
बाजैया बुजियो मोजाङैनो मिथियो
मानो थायथाय बिउथि फार्लार?
मानोथो सेनेमा एदबादेस्फोर...?
फफुलार जानांगोन फफुलार।
बेनि रादाबा फोसावजानांगोन गुवार।
लेखा बिलाइयाव फेरलेबसे मुं गैया
खन्थाइ रायथायखौ बहा लिरनो हानो?
गियान आरो बुद्दि गैयाब्ला?
नाथाय बेल'नो नङा;
टी भी सावथुनावबो आंनि महर गैया,
(केट्रिना, नेन आरो अनज'लिना बायदि बोरै जानो हानो?)
पप्, डिस्ख', रमान्टिक बायदियावबो
आंनि गोदोना फोलावना रोजाबनाय देँखो गैया।
थेवबो थेवबो सिनायगौ आंखौ
बड'लेण्ड हावस्, फार्लेमेन्टनि सुखिदारफ्रा,
कक्राझार बाङाइ सहरनि रेष्टुरेन्टारफ्रा,
(फिसा फिसौ हटेल बिगोमा एबा गलादारफोरखौ दोन)
आरो सिनायगौ मोजाङैनो
देवानि कन्ट्राक्डार, एम एल ए, एम सि एल ए
सेले बेले राजखान्थिगिरिफ्रा।
बेनो थोजासे नङा बाजैनि मुंदांखाया,
बैसोआ द्रोद द्रोद ट्रेक दान्दोँ
बाजैयाबो मुंदांखासिन जागारदोँ।
सुरिदारा गोजाम जाबाय
(हार्सा बेँगलि बेहारिफ्राबो गानलियानो)
दानिया बाजैयाबो लंफेन गानबाय,
(बिनि उनाव हाप्पेन?)
गाज्रि बाथ्रा नामा?
रावनिबोथ' खहा जायाखै,
जादोँब्लाबो सोरबा गिख'
हारिमु अनसायारिल'सो;
बाजैनि गोथौ गोरबोजोँ बिजिरना मोननाय।
दानिया सेले बेले देवानिल' नङा,
सेले बेले राजखान्थिगिरिफ्राल' नङा,
साफ्रोम उन्दै बैसोनि गथ'फ्रानो नायो
(ए फि जेनि बादिब्ला
साफ्रोम फरायसाफ्रानो बिगियानगिरि)
खाफालसिम मेगन बोखो बोखो
71नि 81नि थखन थुनाय
बोरायसाफ्रालाय....? ?
This poem has not been translated into any other language yet.
I would like to translate this poem