मिजिँ दं आंहा नोँजोँ Poem by Ronjoy Brahma

सिरिनाय बिबारनि मोदोमनायखौ
बेरे सिखिरिया मोन्दाङा,
गांखं बायनाय सिखिरिखौ
थमेन्नाय- गेवलां बिबाराबो लामा नाया;
अनजालि, नोँनि गसरनाय मोदैयानो
आंनि गोरबोखौ फिसिबाय;
नोँनि हांमानि गाबनाया आंखौ अनखां होबाय।
आं मिथिगौ, आं मिथिगौ अनजालि
नोँनि गाबनायखौ: नोँनि हांमाखौ
नोँ थारैनो फाइलि गोमाजानाय नङा।
बोथोरखौ सहायनो हायै
बोथोरनि इनाय गाग्लोबनायाव
नोँ थारैनो गावखौ रैखा खालामनो
(मिजिँथ' दं नोँहा)
गावनि सायावनो थाखोमादोँ।
नाथाय आंबो गांखं गोबाय नङा सना,
थिवरिया मोनसे बोथोरखौ बाबेन होनो
आंबो आंनि सायखंआवनो दं।
मिजिँ दं आंहा नोँजोँ
बै खोलो खोलो बार- -
मिनिसुलु दाउसिननि गोदै,
जारौ सुदेम गोदान फुंआव।