मोसौ बोराय Poem by Ronjoy Brahma

ख्रद ख्रद हंख्रददोँ लालेया
बारिया मेना थिमफ्रिमोनहा
गोदो गोदो उन्दुलांदोँ
-
साने लावमुराया उन्दुलाङाखै
जिगाब गोरान सावले सावले
खेबनैसो थं थं गुजुना बियो सान्दोँ-
-
बेसे जाबावनो जिगाब गोरान
दिनैबो खिफि बेन्दोँ
गाबोनबो फोथारनि दुब्रि गांसो
गोथां सोमखोर बुदां माहाजोननि
फैलाव माय दुब्लिखौ
नोजोर होयो आं-
माब्ला मोनो फिथाइ
माब्ला रोगाजायो बिदां बजाफा बजाफा
-
फंनै फंथाम बुजानायखौ मानिथारा
गिदिँ गिदिँ मागा मुगायै
जागोन आरो जागोन आं
मारा होयोब्ला उदै बुंजासे
-
माब्ला मोनजाबावगोन नारा गोरलैखौ
नाथाय बोथोरा-
एखमबा उखैना बारा जायो
अब्ला आं सानो-
लरग'नि सोमखोर मायखौ
दब्लायसे जाना
थेब्रे उदैखौ सुफुंनो
-
नाथाय आंदि नाइलन दिरुंजोँ
थे थे गोरायै दोनदाल होजानाय
अरस'बायो आं थेवबोनो
बोराय आंनि हाथाइय
बांसिननिफ्राय बांसिनसो मिजौओ
-
सान हर नेबाय थासै आं
माब्ला फैबावगोनब्रा आगोन दानआ
माब्ला फैबावो मागोआ!