नों दा उनदुलांबाय जानो हागौ!
आं मिथिगौ नोंहा दा उनदुनायनिनो सम
नाथाय दानो उनदुथवा आं
मावनांगौ गोबां खामानि दं
गोलेरनि उदै सिङाव हाबलांना दं थोबसे अखाफोर
गोलेरजों जुजिनांगोन
आरो अखाफोरखौ दिहुननानै लाबोनांगोन
बिनि सोरांखौ माखनबादि आवथिनानै
बिनि सोरांजों सिथ्लायाव गेलेनांगोन- जोंनि आगैमोन
आमाइ-जुमाय, हाखर सिखर बायदिसिना
हरनि गोसोम ट्रिपाल बोखारनो गले गले फैबायथाग्रा
बे अखाफोरखौ मोजां मोनो आं
दासानदि बिखौ नेनायावनो मेगन मोदैजों गोजावलाङो
खोमसि आरो थाद'नाय गैयै दैमा-दैसाफोरनि हज्रिख्रावनाय
मेगन मोदैयाव गाबो दाउसिन-दाउलाफोर
बेबादि थासारियाव अखाफोर नेनायनि आंहा हुदा जालांबाय
नों दा उनदुलांबाय जानो हागौ
आं नोंखौ फोजानो लुबैयो
नाथाय आंनि गोदोनायाव सेरनानै
नोङो आंनि माथो खोमानो हागौ
बेखायनो आं नोंनो दोंसे खन्थाइ लिरहरो
जाय खन्थाइखौ फरायनानै
नोंनि उनदुनो ओंखारनाया खारलाङो गोजानाव
This poem has not been translated into any other language yet.
I would like to translate this poem