आं सासे अनजालिनि गेजेन Poem by Ronjoy Brahma

गोहोआ आंनाव दं
गियाना आंनाव दं
थेवबो थेवबो आं गेजेन
आं सासे अनजालिनि गेजेन।
आं हादोदखौ सालायदोँ
हादोदनि गासैबो मेलेम जिबिखौनो,
आं मिथिँगाखौ सिबिदोँ
मिथिँगानि दंनाय मानिखौनो।
फुरसब खासि बिबार मोसा होना
मिथिँगाखौ मिनि होनो हायो आं,
फाख्रि बिफांनि रोदा सोमावना
जुब जुब अखा हाहोनो हायो आं
सोरजिगिरि, सोरजिगिरिनि सोरजिखौ
दिखार गोनां गाबहोनो हागौ।
हादोदआ दा आंनि
मुलुगखौ आवग्रिनो?
मुलुगखौबो आवग्रिनो हागौ,
सोर्गोखौ आवग्रिनो?
नङा नङा हुनुमानआ सानखौ मन'नो नागिराय
थिफुद्लानि सिनायथि जागोन।
आंखौ बयबो मोजां मोनो
मोजां मोनो आंबादि
सोर्गो-नोरोक-फातालनि राजाफ्रा
आं नाथाय बिसोरखौ गाग्लोबनो हागौ
बिसोरनि राजा जानानै थानो।
थेवबो थेवबो आं गेजेन
हे गसाइ! हे मिथिँगा!
हे मुलुग! हे हा, दै, अर, बार अख्रां
आं सासे अनजालिनि गेजेन
जाय आंखौ मोजां मोना
बियो गावनि गोरबोखौनो होआ।