दोरखाष्ट Poem by Ronjoy Brahma

कमल कुमार ब्रह्मनि
गोदान फैसालियाव अर नांबाय
आवबा जानाय दाबि
इरागदावनि बिखायाव जसिन्नानै
सोमबोरा गले गले दाबाजोँ सुयो
आरो मुगानि थान्दै, सोरबां, सोमला.....
बिसोरो सिबाय इनजुर खनानिफ्राइ
गावग्लि जाबाय थायो
आलारि फोजोँग्राथावनि थुलुंगाफुरि
बेवहाय गाबनाय खोनायो आफानि
दिँग्रिनि दावहायाबो जोबलिया
लामायाव आलाइखुंग्रिया
बिसोरखौ नारख्लायो लामा जानानै
थैजोँ देलायो बियो गावनि गुसुथि
प्रेटलनि दावरावखौ बुंलिया
हालुवानि आखाय बुथुम बुथुम
मैयासो जिगाबनि एम नागारनाय सुबुंआ
बर्बर रंजानायजोँ सनानि एम बानायदोँ
दुफां बोथोरनि लावखार गथ'नि सिफुंआ
हाबाब बेसे गोदैमोन.....
लावखार बिफां नागिरना मोन्नो थांलिया
मोसा मासे गावथारनानै
मोसा बिगुर गान्नानै फलाना बेसेबांदि रंजानाय मोनो
खोमसिखौसो मोजां मोनो मोसाया
खोमसिनि आखाय दाख'यो मुगानि फलान
खौरांआ दिनै जोबोद गाज्रि
हे नीलु!
सोरांनि आखाय दाख'नो नेनानै थायो जोँ