अखा- 03 खबानि थैनाय Poem by Ronjoy Brahma

43
फिसाय थैनायनि उनाव
बिबायनानै जाबाय खबाया।
हर सान गोबां बारहोबाय
थांबाय दान दाननि उनाव।
44
सान्नैसो उनाव खबानि गोरबोनिफ्राय
जोनोम जासिगोन फिसा।
बिनि न'आ बायलांबाय
गुबुननि न'आव आस्रय नागिरबाय।
45
ओजोँ बिखौ बयबो मुगैबाय
रावबो जायगा होआखिसै।
खायसे बिखौ सोँखारिबाय
सोरबा बिखौ मुजुलानायसै।
46
खबाया फिसा जोनोम होथारसिगोन
ओइदिनखालि बार बारबाय।
अखा खोरोमबाय अख्रांआव
जुब जुब अखा हाथारसिगोन।
47
गावनि गिजि देराखौ
फोसाबना होनो थाखाय।
मोदोम बुद्रु बुद्रा रायजोफोरखौ
खबाया सासेनि उनाव लेँबाय सासेखौ।
48
बिखौ रावबो मदद होलिया
बिखौ मुगैबाय बयबो।
रायज्लायाखिसै सोरबा सोरबाया
खोमा माथुबाय गासैबो।
49
खबाया दुखु खालामबाय बेसेबा
मुलुगखौ मुगैनाय सोमजिबाय।
इनाय अगेनै खबाखौ सोबाबाय
खायसे बुबाय सोरबा सोरबा।
50
खबाया मोदोम बुद्रु बुद्रु
गिजि देरासिम फैफिनबाय।
रायजोफोरा बयबो सफैबाय
लावख्रि बारियाव खबाखौ गारहैबाय बुद्रु बुद्रु।
51
खबानि खानायखौ हास'ना होबाय
बिनि आखायखौ दानस'बाय।
बिनि आथिँखौ आरो
बिनि सिखौ खुना गारहरो।
52
अरनाव खबाया बाब्राबो
रायजोफोरा न'आव फैफिनो।
जोबोद जुब जुब अखा हायो
मुलुगा सार अन्थाइजोँ गोमफबो।
53
बिफां-लाइफांआ गाबो
हरा बेसेबा खोमसि जायो।
जिब-जुनारा गासैबो गाबो
खबाया गथ' जोनोम होयो।
54
मुलुगा दैबानाजोँ बुंफबो
जिब-जुनारा बिफांआव गाखोयो।
बिसोर हाजोआव मानखोयो
खबाया होख्राव होख्राव गाबो।
55
बियो गोजावबोयो गामि फारसे
गथ'आ थाबोयो अरनाव।
हराव हाबाय अखा हरसे
दै बाना जाबाय जेरबासे।
56
खबाया थैबाय आरो
गावनि गिजि देरायाव थाफैबाय।
दावराइ जोलाया गथ'खौ लांबाय
लासैनो अखाया हागाबाय।
57
सानजाजोँ साना ओँखारबाय
मिनिसुलु अख्रांआव दाउसिना बिरबाय।
अरनाव बयबो रंजाबाय
अरना मिनिसुलु मिनिबाय।