1
मिनिसिरि दैसानि आफांआव
दाउस्रि फारानि गासै गथ'-गथाय,
सेंग्रा-सिख्ला आरो बोराय-बुरै
दुलाराइ मानसिफोरा दुगैयो।
2
लावख्रि बारि बागानखौ बारनानै
सिगुण हाजो सेरावसो सिरिया दुगैयो,
ओइदिनखालि सानजानि साना
सोनाब फैसालियाव दिन्दांसै।
3
सिरिया रुम्बांआ दैसायाव दुगैदोँ
गावनि सिखौ मोजाङै सुदोँ,
दाउस्रि देलाइबायदि ददेरे ददेरे
देलाइदोँ समायना दुगैखांनानै।
4
अरना दैसा सेरनि फांसे बिफांआव
थाखोमाना बिखौ नायहरदोँमोन,
अरना बेबादि सोमोनांथाव महरनि
नुफेरै सिख्लाखौ नुनानै बोदोर जादोँमोन।
5
उन्दै समनिफ्रायनो अरनाव थायै थायै
गोसोथोनो रोङै गोरबोआव,
गोसोथोनो गोदान जिउआव
गोदान गोरबोनि जोनोम जादोँ।
6
सिरिया रुम्बांआ गावनि दखना गिसिखौ लानानै
न'फारसे मोखां जाबाय,
बे समावनो माब्लाबानो सोरबा सेंग्राखौ
गावनि मोखांआव नुबाय।
7
लोगो लोगो दुबफुं बामखांनानै
अरन गेजेराव लानानै थांबाय अरना,
रुम्बांआ गावनि गारांजोँ होख्रावदोँ
रिउ रिउ जेरैबो रिँलांदोँ।
8
''सोर फैयो खैफोदाव
सोर फैयो?
आंखौ रैखा खालाम
रैखा खालाम! ''
9
सिरियानि खैफोद गोनां होख्रावनायावबो
बेसेबा गोदै जादोँमोन,
सोमखोर अरननि बिखायाव
बिफां-लाइफांनि बिलाइफोरा मोसादोँमोन।
10
बार खोलो खोलो बारदोँमोन
अरननि मोसा लख्रा,
सियाल मैदेर मोख्रा
खुसियै गासैबो रंजादोँमोन।
11
सोमखोर अख्रांनि जोमै
सुदेम अरननि दाउसिन-दाउला,
बेसेबा समायना जादोँमोन
दाउसिनफोरा मेथाइ रोजाबदोँ।
12
फाफ्लियाव लानानै अरन गेजेरजोँ
सिगुण हाजोखौ बारलांबाय अरना,
अरननि लामायाव बिफांआ
मेथाइ खनबाय गोदै रंजानायजोँ।
This poem has not been translated into any other language yet.
I would like to translate this poem