Ronjoy Brahma

Gold Star - 35,252 Points (2 November 1995- / Amteka (Chirang) /Assam, India)

अरननि सिख्ला 1.02 मिनिस्रिनि मिनिनाय - Poem by Ronjoy Brahma

22
बुहुतआ खानानै गालांनाय खानायखौ
दोँफा दोँफा अरस'यो बारसिना,
गावनि गोजोँ मिहि हाथाइजोँ
बारग' राहा मोनाखै बियो थेवबो।
23
दोँसे अरस'यो दोँसेया खायो
दोँसे अरस'बा दोँसेया खायो,
मेँग्लिहाबो बियो जेन्नानै
दलरै जिरायना थायो।
24
गोसोजोँ गोसोआव सानबाय जावलिया
बिनोथार बिनो आंनि अनजालिया,
जायखौ आं सिमांआव नुबाय थायो
आय' सना नोँ बेवहायसो।
25
मिनिसुलु मिनिस्रि सिख्लाया फैब्ला
मेंग्लिनाय बारसिना नुनानै सिखारदोँ,
समायना रमायना महर मुस्रि
थै जारौ देहा सोलेर।
27
रुम्बां-हायबां जानजि बालेँ
एनजर गुदुंनिफ्राय ओँखार बोदोँ,
लाजिसुलु मिनिसुलु मिनिसिरि
बियो लासै लासै मिनिसुलुदोँ।
29
हाद्रि नांनाय दखनाखौ बुस्रियो
लाजिसुलु मिनिसुलु खाथियाव फैबाय,
खाथिनिफ्राय खाथिसिनथाराव
जेरैबो सोरां बिनि फैनायाव।
30
गल' जानाय बारसिना सोँनायसै-
सना नोँ सोर जाखो?
नोँनि मुं आरो थंआ-
आं नोँखौ बोदोरसो जाबाय।
31
नोङो बहानि सना?
मिनिस्रिया बुंनायसै-
आंनि मुङा मिनिस्रि
आङो मिनिनो मोजां मोनो।
32
नोङो बहानिफ्राय फैखो?
जावलिया बारसिना बुंबाय-
मिथिया आं जेबो मिथिया
आं दा बहा दं?
32
आं बहानिफ्राय फैखो?
अब्लाबो आं बुंगोन सना,
आं दा नोरोकआव दं सोर्गोनिफ्राय फैदोँ आं।
33
ददेरे मिनिस्रिया बुंबाय-
आदा बेनोथ' आंनि सोर्गो,
नोँ बबे सोर्गोनिफ्राय फैखो?
बेयावनो आं जोबोद रंजायो।
34
देलायै बेरायै गोजोनो
बेनोथ' आंनि सोर्गो,
जावलिया बारसिना बुंबाय-
नंगौ सना बेनो सोर्गो
नोँखौ लोगो मोन्नायाव गोजोन्नाय दं।
35
नोँखौ नुनायाव गोजोन्नाय दं
नोँनि मिनिनायाव गोजोन्नाय दं,
नोँनि खुसियाव गोजोन्नाय दं
बेदि गोजोन्नाय सिगाङाव मोनाखै।
36
बेनो सोर्गो सना
बे लोगो मोनलायनाया सोर्गो,
बे मोजां मोन्नाया सोर्गो
बे रंजानायानो सोर्गो।
37
बे गोजोन्नाया सोर्गो
बे नुजेन्नाया सोर्गो सना,
बे मिनिनाया सोर्गो
बे समायनाया सोर्गो।
38
बे गोरोबनाया सोर्गो
बे गोथार सोर्गो,
मिनिस्रिया बुंनायसै-
दाहार गैयै लैथोआव गोजोन दं।
39
बेबादि गुदुं बोथोरनि हावासियाव
नोँनि गोजोनआनो सोर्गो,
मिनिसुलु नायदेरो लाजिना
बियो खानायखौ खेवना होयो।
40
मिनिखैरो मिनियो बारसिना
बे रंजानाया गोजोँ गोजोननि,
जावलिया बारसिना बुङो-
आं मेंग्लिनायजोँ दै गांबाय।
41
नोँ आंनो दै लाबो सना
आं गांगाजासे लोँनि,
बे सोर्गोनि समायनाखौ सानैजोँ
दिनै जोँ नायगोन जरासे।
42
सानैजोँ फोरमायलायगोन गोरबोनि बाथ्रा
नोँ आंनो दै लाबो मिनिस्रि,
ददेरे मिनिस्रिया बुङो-
आं लाना फैनि आदा।
43
नोँनि गांनायाव रागा दं
बे रागाखौ आं जिमायहोनि,
आं लायनो थांनि आदा
नोँ बेवहायनो जिराय दान्दिसे।
44
लासै लासै खारस्लिउ
मिनिस्रिया थांनाय फारसे,
नायहरदोँ बारसिना जेसे हागौ एसे
बेयाव समायना दं।
45
बेयाव गोजोन्नाय दं
बेयाव आन्दोनि मोनसे बोराबनाय दं,
दान्दिसे नुलिया मेगनाव आरो
मिनिस्रिया आन्दोआव गोमोरलांबाय।

Topic(s) of this poem: love

Form: Epic


Comments about अरननि सिख्ला 1.02 मिनिस्रिनि मिनिनाय by Ronjoy Brahma

There is no comment submitted by members..



Read this poem in other languages

This poem has not been translated into any other language yet.

I would like to translate this poem »

word flags


Poem Submitted: Wednesday, December 9, 2015

Poem Edited: Tuesday, July 12, 2016


[Report Error]