अरननि दाइरि 1.03 फिरि फोथारनिफ्राइ Poem by Ronjoy Brahma

32
मोसा लख्रा थाबायग्रा लामाजोँ
गिरोम गिरोम हां गुदुं जानानै,
थाबायबोदोँमोन सिरिया रुम्बांआ
सम सम बिखाया सिरिहां जादोँमोन।
33
सिगुण हाजोनि गोजौआवनो
मोनसे बेसेबा फैलाव फोथार दं,
बे फोथारनि मुंखौ फिरि होन्नानै बुङो
बेसेबा सोमखोर उदां नायबा नायबाय थाथाव।
34
हां गहां गहां जोबोद मेंग्लिनायजोँ
अरन मोनसे बारनानै,
बे फोथारावनो सफैदोँमोन रुम्बांआ
रोजासे सनालु मोख्राया बेयाव मुहिनां गेलेदोँमोन।
35
बेफोरखौनो नुनानै रुम्बांआ गोमोहाबदोँ
गोमोथाव सनालु मोख्राफोरनि गोजोँ मेगनखौ,
नायनानै बियो जल्दब गोग्लैदोँ
हरजोँ हर मोख्राफोरा अरन थाग्रासिम लानानै फैदोँ।
36
हरजोँ हर सनालु मोख्रामोना
बेसेबा खुसियै एम बानायदोँमोन,
समायना रुबु सुबु
दाउब' गां बुथुमदोँमोन।
37
मिनि खुसियैनो दाउब'मोना
गावसोरनि बासानिफ्राय गांखौ हरदोँमोन,
बेसेबा समायना अनजालि रुम्बांआ
अरननि सेरावनो गोदो गोदो उन्दुलांदोँ।
38
हां बोलाय हगारलाय
बिखाखौ गोजौ गाहाय खालामदोँमोन,
बिनि लाइमोन सोलेरा
बेसेबा गोसोखौ बोख्लायदोँमोन।