अरननि दाइरि 1.06 रुम्बांआ खारखोमानायनिफ्राइ Poem by Ronjoy Brahma

77
रुम्बांजोँ खर'आव अन्थाइ खुबै जानाया
द्लामैनो जादोँ अरननि गाराया,
जेब्ला रुम्बांआ उदै बेग्रांजासे
थाइगिर फिथाइखौ जाबाय थायो
78
अब्ला हाग्रा मुलि नागिरदोँमोन अरना
दंफांनि बिगुर आरो बिलाइखौ,
गावनि आखायजोँ खेबखादोँमोन
बे खाबुआवनो रुम्बांआ आन्दोयै खारखोमायो।
79
खारै खारै बबेजोँ मिनिसिरि दैसाखौ मोनहैगोन
लामाखौ दिहुननो हायाखै,
अरन सौसि सौसि अरन गेजेराव
आन्दायनानै बोरैबा थाइगिर दैसायावसो सहैबाय।
80
जोबोद समायना थाइगिर दैसाया
ख्लाब-ख्लिब खोलो खोलो,
बेसेबा मिनिखुसि बोहैनाय दैसा
अराय बोहैगासिनो दं बियो।
81
दैसानि सेर सेर सोरगिदिँ जेरैबो
गेवलां-गेवथां हाग्रानि बायदि बिबार,
दैसानि सेर सेर थाइगिर बिफां लारि
फिथाइफोरा बाज्रुमहां थब्लहां।
82
दैसा बिखायाव नायगोमाना थादोँ
गोबां रिदि रिदां सानथ्र हायै,
गोमोन फिथाइफोरा दैसायाव
बाज्रुमनो थियारि जानानै दं।
83
थाइगिर दैसानि गोदान मिथिँगाखौ
मुहिनां मोखांजोँ नायगोमो हाबबाय रुम्बांआ,
नायै नायैनो समायनानिफ्राय
आरोबाव समायनासिन नुबाय।
84
खोलो खोलो बारा बिनि सोलेरखौ
दैसायाव गोजोमगौ गोसो बोरहोबाय,
जेरैबो रैसुमै रोजाबनाय दाउनि
गोदै मेथाइफोरा गोसोखौ गलि होबाय।
85
जोबोद अनसुलि जानानै
दैसा फारसे रुम्बांआ,
खाथिनिफ्राय खाथिसिनाव थांबाय
लासै लासै मिनिसुलु समायना।
86
अब्ला हानजासे सिख्लाफोरखौ
लंथं लंथं दुगैनाय नुबाय बियो,
फोथायगोन फोथाया जानानै
मेगनखौ बिलिरना नायबाय नंगौ।
87
बिसोर लंथंङैनो दुगैदोँ
जोबोद समायना समायना सिख्लाफोर,
बेबादि समायना सिख्लाफोर
माब्लाबाबो नुफेराखैमोन रुम्बांआ।
88
सिख्लाफ्रा रुम्बांखौ नुहरनानै
आखाय फोलाव फोलाव लेँहरबाय,
बिसोर आखाय फायखन फायखन
बेसेबा खुसियै लेँहरबाय।
89
रुम्बांआ बिसोरजोँ दुगैफाबाय
मिनि खुसि गोजोन सिमांबायदियै,
समायनायै बादुंगा गेलेलायबाय
दै सारफावलायबाय मिनि खुसि।
90
सिरिया रुम्बांनि दखनाखौ
सिख्लाफ्रा ब्रुद खुनानै होबाय,
रुम्बांआ जेबो उदिस मोनाखिसै
बियो मिनिखुसि दैयाव थब्लबाय।
91
सानस्रिबाय आरो सिफ्लाफोरजोँ
होसोलायनाय बादुवा गेलेबाय,
थाफुं थाफुं खालामबाय बिसोर
सिरिया रुम्बांआ मुलुगखौ बावलांबाय।