अरननि दाइरि 1.10 दखना मोन्नायनिफ्राइ Poem by Ronjoy Brahma

173
फुंआव दाउसिन दाउलाया
गासैबो सिरि मोन्नाय लोगोसेनो,
सिरि मोनदोँ सिरिया रुम्बांआ
हराव जोबोद गाज्रि सिमां नुदोँ।
174
सिखार मारैनो अरनखौ नुदोँ बियो
गावखौनो थेनथौज्रोम आरो
खौखाब सुंनानै नायबाय थानानै दं
जोबोद दुखुआव गोदोनाय मानसिबायदि।
175
रुम्बांनि सिखारनाय समाव
मोदोमाव फबनाय बिलाइ गोरान आरो दावगांफ्रा,
रुम्बांनि मोदोमखौ नागारदोँमोन
ज्राव ज्राव समायना देँखोजोँ।
176
अरनखौ नुमारैनो सिरिया रुम्बांआ
लाजिनायजोँ बियो गावनि फेन्दाखौ,
हाखु-दाखुयै खोबनानै लाफिनदोँ
बिनि उनाव हरखाब रागा जोँखांदोँ।
177
अरनखौ जोँ नायनानै बुंदोँ-
''थारैनो नोँ मा हास्थायो?
आंखौ मानो बेयाव लाबोखो?
नोँनो मा नांगौ बुङा मानो?
178
आरो आंनि बेबादि लंथं सोलेरखौ
नायबाय थानानै लाजिनाय मोनाखै?
ना नायनानैनो गोजोनदोँ?
आंखौ जिनाहारि खालामा मानो?
179
अरना लाजिनानै मेगन मेसेबो
हरखाब बिनि मेगननिफ्राय मोदै गयो,
अख्रांखौ नायदाव हरो बियो
फिन आरो हायाव नायगङो।
180
रुम्बांआ बेबादिखौ नुनानै
बांसिन रागा जोँनानै बुङो-
''नोँ आंनि थाखाय गाबफ्लादोँ
नाथाय आंनि थाखाय गाबनांगौ मा दं?
181
आंलाय नोँनि सोर
एबा नोँलाय आंनि सोर?
नाथाय मिथिगौदा-
आंनि आयफाया बेसेबां गाबदोँ?
182
आंनि आंगोफोरा गासैबो
बेसेबांदि दुखु खालामदोँ बियो,
नाथाय नोँहा आंनि सायाव
मा हास्थायनाय मानि?
183
नोङो आंनिफ्राय मा लुबैदोँ?
फिन्नाय होआ मानो?
जेबो बुङा मानो?
मा लुबैयो नोङो बुं।
184
हरखाब नोङो आंखौ
मिनिसिरि दैसानिफ्राय हमनानै लाबोबाय,
नाथाय जेबो खालामा मानो?
आंखौ बुथारा मानो?
185
अन्नानै आंखौ हगारहरदो
मिनिसिरि दैसासिम दोनलांफिनदो,
गासै आंनि आंगोफोरा आंखौ
सिबाय नागिरगासिनो दं बियो।''
186
बेबादि बुंनानै उनाव बेसेबा
हब्रा हब्रा गाबदोँमोन रुम्बांआ,
गावनि मोखांखौ फांथेनानै
खुग्लुबसोनानै गाबदोँमोन बेसेबा।
187
सानजौफु समाव अरना
रुम्बांखौ लानानै दखनाखौ नागिरनो,
गोख्रैनो थांफिनदोँमोन दैसायाव
सिरिया रुम्बांआ उन उन थांफादोँमोन।
188
नाथाय सोनाब फैसालियाव
सानजानि साना दोबैलांब्लाबो,
सिरिया रुम्बांनि दखनाखौ
बिसोर नागिरनानै मोनफिनाखिसै।
189
हरा खोमसि जाब्लासो
अरन आरो रुम्बांमोना,
फेलेँनि हांमा सुरनानै एमाव फैफिन्नायसै
बिसोर जोबोद मेंग्लिथारदोँ।
190
आरोबाव रुम्बांआ अरनजोँ
फैफिननो गोसो गैलियामोन,
गाबै गाबै हायावनो बाब्राब बायदोँमोन
अरना बामखांनानै लाबोदोँमोन।
191
हरनि समाव मानै मोख्राया
रुम्बांनि दखनाखौ लाबोनानै होफैदोँ,
लोगोसे दंफायोमोन बै फलाननि जलंगाया
दै बथल जोँफ्रुद खाबसे।
192
जलंगायाव दंमोन थालिर फिथाइ
सिरिया गाबबाय थादोँब्लाबो,
बियो जोबोद खुसि जानानै
मोख्राखौ बिलिरना खुदुमनायसै।
193
मोख्राया मिनिसुलु जानानै
लासै लासै थांफिनदोँमोन,
सिरिया रुम्बांआ गोसो होनानै
थालिर फिथाइखौ खुसियै जानायसै।
194
बियो मिनिखुसियै गावनि दखनाखौ
जेरबायाव गान्नानै लानायसै,
बियो जोँफ्रुदोँ अर फोजोँनायसै
गावनि आखायखौ हांनायसै।
195
बेसेबा खुसिजोँ बियो अरनखौ नायदोँ
अरना गोजोँ मिनिदेरदोँ,
हराव गोदो गोदो अरननि सेरावनो
गोजोनै उन्दुलांनायसै रुम्बांआ।