लिमारिक (1-32) Poem by Ronjoy Brahma

1.
बिफानि राव गिलिर जाब्ला
दौ जोगदावहर नोँ अब्ला
बिमानि रावआ खाब्रां जाथोँ
नोँबो दाद्रि होनो हाथों
हे लोगो सौसि जेरैबो थुमफ्ला।
2.
बेखौसो बुङो हादुंगोरा
गामियारि समाजनि गावबुरा
खानाय गोमोन जानांगोन खर'आ
अब्लासो बुंगोन आबौआ
गामिनि उन्दै उन्दै गथ'फोरा।
3.
जाफेरा माब्लाबाबो ओँखाम गोजा
लोगोआव गैयाबा बेदर फाजा
सानस'नो हायै सोदोब खुगायाव
आखाय गैया मावनायाव
नायब्लाय मानसिया हारा गोजा।
4.
बिनि गोसो थोनाय सिख्लाया दुगा
बिनि खावलाया जायो मिनिबा बुगा बुगा
खानाय हसारनाया बिनि हुदा
रायदावनाय जंखायनाय आदा आदा
बेखायसो नामाथाय बिथांआ दुगा।
5.
नाफालिनि बुरैनि खुगाया गागेब गेब
एरसोना थानाय न'आबो गेब
मिनिनाय रायज्लायनाय हाजि जि
न'आबो नायनायाव गिजि जि
ओरैनोबा नाथाय बुगेब गेब।
6.
आबगारि ग'ला बाजै गांजेमानि
मोनाहाब हर थौहाब लोँग्रानि
सम गैलिया फरायनो बिजाब
फिसाफ्रा सिबाय दुखु सैहाब
फालांगि बेनो बर' हारिनि?
7.
आमटेका बाजाराव सिख्ला मेला
देलायनाय थाबायनाय मिनि बाला
बिमा बिफाया सिगां नङा
अननाय थुलुंगानाय खम नङा
फिसाफ्रा हले जेरैबो आला-माला।
8.
आलु देवानिनि थांखु थेमा
सोना लायो लाइजामसो थुमा
फरायनो रोङा लाइजामखौ
फरायनो होयो सम सम हार्साखौ
सिबाय अनथाव बाथाव खुदुमसै सुमा सुमा।
9.
क्रक्राझारिनि फैदोँ सिखोला सासे
लोगो हमदोँ सेँग्रा सासे
गान्नाय जोमनायखौ दाबुंसै
सान्नानै लादो बिदिनोसै
हाबाब मोदानथारदोँ बयनिबो मेगनाव दान्दिसे।
10.
खावब्ला सिब्ला सेँग्राया
लाजिनाय गिनाय जेबो गैया
बिमा-बिफानि सासेल' फिसा
रागा जोँब्लाथाय जाखायो मोसा
मोजां गाज्रि रावखौबो सिनाया।
11.
खोथायाव बाथ्राया दुगा दुगा
हास्थायनाय-लुबैनाया अख्रां नांगा नांगा
रायजो राजाखौ थगायग्रासो
गासैखौबो सानो गावनि सिङावसो
बियो सोलियो हारिनि बादगा।
12.
खोमसि हर जाब्लासो साजायो
हर थौहाब थौहाब बेरायो
मा जाखो मिथिलिया
साननो बुजिनो नाजालिया
समा जाब्लासो सांग्रेमा बिरथिँङो।
13.
गाफब देवानिया हादान फारानि
स्ल' स्ल' रायज्लायनायाबो इंलिसनि
एरसन एरब्र होनाया खैसारनि
बिसार सालियाव साजाया जुथानि
जाथारबाय देवानि बांद्राइ सुथानि।
14.
गोदान फावखुंग्रि बर'नि
महारानि बियो सावथुननि
मोजां मोजां सेँग्राखौ जोगारो
बलिउड्-हलिउड्नि सेँग्रा नागिरो
एकटिँआबो खालि पर्न-स्टार्टनि।
15.
दैसा सेराव जहाब जहाब
मादि नायगोन सानहाब सानहाब
हाबाब गथ'नि जाद दिखुरा
गोलाव गोलाव खानायफोरा
फन रायज्लायनाया खोमायाव बोथाब बोथाब।
16.
बेसारा सानो बुंनानै लानो
सिरि सिरि नोँखौ मोजां मोनो
जाम्बानि साजायनाय महरा
सिख्लायाबो खेबसे नायसनगारा
हाबाब बिखा गावगोन बिदिजोँनो।
17.
जोँ गामिनि हालुवा
सिखा रुवायाबो बौथुवा
आबाद मावनायाव सम मोना
फान्नायाव मुवायाबो दाम मोना
बायना जानाङो मैगंफ्रा बुरजवा बुरजवा।
18.
थांखु सोबब्लानो जायो बोलो गोरा?
नुयो आंलाय माथो खुगा गोरा
हाथाइ रोदाया जलांनो हमो
महरा जालांङो लासैनो गोमो
हाबाब खुगायाव हनै माथो दुगा मारा।
19.
थाखा फैसानि गलाम बेयो
हां मोनस'यै थाखाजोँनो फबजायो
मोजां खामायनाय रां नङा
मोदै-गोलोमदै फसरनाय नङा
उनाव गावनो रांजोँ सोबाजायो।
20.
थांनाय सानाव थां खाल्थां
आगर एरनायाबो गोमो गोथां
दा नुसै मानोबा बाहादुरि
बिहारी बेँगलिनि फिथिकट सुरि
ब्रे ब्रे जिलांबाथाय सिमां मोकथां।
21.
खान्थालगुरियाव दङनो सासे दायना
बयजोँबो बुंजायो बेखौ रना
बायदि बायदि बेमारखौ फाहामो बियो
बेनो दाय जाबाय मोना मोना बेरायो
हुसियार हुसियार बयनिबो खुगायाव दायना।
22.
दानि जुगनि बर' जोहोलाव
खानाय लानायाबो गोलाव गोलाव
हाथाय बाजाराव नुब्ला फेन खान्दा
मानसिफ्राबो नुब्ला सालाय खान्दा
बुंनानै लानाय खुगायाव जिउ गोलाव।
23.
आमोखा फलाननि लावथि
सिगिबायो मानसिखौ खिथि खिथि
सिखार खालामनायाव बानाय गैया
खामानिखौ बारा मोदोम थैया
लिडारजोँ नुजाब्लासो मावथि मावथि।
24.
फां फुं गेलेँफुं मुंआ बिरफुं
थांनाय फैनाय हाद्रि जोफुं
देहा सोलेरा सोरलाब लाब
सिगारेड् सोबनायाव बोथाब बोथाब
मानसिफ्रा बुंथारसै फां फुं।
25.
नङालाय एम एल एनि फिसाजो
नोँलाय हालुवानिसो फिसाजो
कलेजनि देवना मोनबाय दे
दे दे हागौमानि देखाय दे
संसारखौबो जा थिवरिया बाजो।
26.
बैग्रि बुरैनि हायना मुलि
दासिम जाबाय जरा 15 जुलि
खाथिलिया दानिया
खर' खर' गिदिँलिया
होबथा होबथा गसंबाय दाक्टारनि मुलि।
27.
बड'लेण्डनि सिख्ला महर गोसा
गान्नाय देलायनाय दाम गोसा
मोसानो रोङा बागुम्बा
हटेल क्लाबफोराव नङाब्ला
गोदौग्लाबबाथाय सोलेरा नांगौ खनासा।
28.
बुदां माहाजोन गायदांनि रुवाथि
हाथाय बाजाराव थांब्ला बेन'थि
हायस्लिब सोलास्लिब बेदर फाजा
नुसन नुसन रायजाब्लाथाय फोजा
आखा फाखा बयजोँबो सिनायथि।
29.
बुदांनि हिनजावआ सिला सिबा
थिनबा लेखा गोरोँ हिनजावआ सोलाबा
सानफ्रामबो अफिश अफिश
साख्रि बाख्रिनिबो न' आबसस्
हाबा जानाया दाबो जादोँ दानबा।
30.
नैजिसे मुगायाव जाय बुंगोन जै
बियो नुगोन हाबायाव थै
बिखा फोर्दान फोर्दान जांख्रिखांगोन
खोमसि हराव गब्रगोन
बाब्राब बाब्राब बेयावनो थै।
31.
गुसुं गुसुं गानाब्ला सेंग्राफ्रा नाया
बिउथि फारलाराव हाबाब्ला समाया
लोरलां लोरथां सेंग्राजोँ खारफा
उदैयाव गथबो लाफा
फैनाय नङा उनाव नानेखाया?
32.
बर' मेलेमनि नोँ मायनारि
इंराजि मेडियामनि हायनारि
पर्न-स्टार्टफोरखौ नोँल' सिनायगौ
हलिउड् केलेन्डारखौ नोँल' मिथिगौ
जानो लुबैयोब्ला जागारदो फायखारि।