आयै नोँ आंनि 1-37 Poem by Ronjoy Brahma

1.
आयै नोँ आंखौ दागालां
बिखुंसानिफ्राय जाल्दाब एंगारनानै
मानबायस्लिँनाय आयै आं
हायाखै थाबायनो दाबो-
2.
रिमोनद्ला संसारनि सिलायाव
गोथोँ थोँनै आथिँजोँ-
दंबावो आयै नोँहा आंखौ फोरोँनो
3.
रिमोनद्ला संसारनि सिलायाव
आखायजोँ दैबायना
दंबावो आयै नोँहा फोरोँनो-
4.
नोँनि गोदै रावजोँ रायनो
आंखौ फोरोँ रैसुमै राव-
दंबावो आयै नोँहा फोरोँनो-
5.
गिलु बालु दै-बाना
गिथाव बाथाव बार-हुंखा
सार अन्थाइ-
आं नेवसिनो हानाय नङा आयै
6.
नोँ आंखौ हारसिङै दागालां
मेगन खाना दान्थारु
मैदेरनि गाग्लोबनायाव
7.
मोसा लख्रा सियालनि
सिखार
आं हानाय नङा आयै
रैखा मोननो-
8.
अलखद खैफोद-आफोदआव
आयै नोँ आंखौ दागालां
सिबलानाय बार-हुंखा
सानबोलावरिनि लामाजोँ गिनानै-
9.
थांना नाथाय जिउ
अरायनि थाखाय
आयै नोँनो आंनि जेब्लाबोनि-
10.
गोलाव खानायखौ खाथबनानै
गावनि आंगो फिसाखौ
बिखुंआव बानानै
आरो आयै नोँ हाया हाया
जानजियाव दैहु-
11.
आयै नोँखौ आं बोरै बावनो?
एंआ एंआ गाबनाय समाव
बुरखायै बामखाङै
आहारजोँ बुरखायनाय
12.
आव आव होन्नानै
खावलायाव मिनिस्लु सब खुदुमनाय
आयै नोँ आंनि-
13.
नोँ आंनि जोनोमगिरि-
सानस्रि दाहारजोँ दैबायना
नोँ हास्थायदोँ-
गोजोँ मिजिँ इयुननि-
14.
गावनि रावजोँ फोरोँदोँ
आसि थुयै थुयै-
ओँखाम जाहोनानै-
15.
बेलासि सम जारां साननि
गोगो साया-सायख्लुमखौ हास्थायनानै-
16.
गोरान हाद्रिनि सिलायाव
दाखोर दाउखिनि रंजानायाव
रंजादोँमोन आंबो मानबायस्लिँनाय समाव
17.
आयनि खामानि मुखुब समायाव
मिनि मिनि मानबायै रंजानानै
बिलिरदोँमोन आं बैसुमुथिखौ गोबानानै
18.
आगर होना
दाउखिनि गाबजोँ-
अनजाथाव खोमोन गांसेव
सैमा खालुनि सोलानायाव
19.
गल' नायगोमोना
नाजादोँमोन खुगायाव होनो आंबो
बुजिमोनै गियानजोँ-
20.
अनसुलि आंनि आय-
दोँ दोँ खारबोना हमथा फैयो
रैखागिरि आयै नोँ आंनि-
21.
जासुला खांखुवा हेँथागिरि
आयै गियाननि नोँ आंनि
सानखांगिरि-
22.
गोरबोनि मिनि रंजानायजोँ
दाउसिन-दाउलानि मुसुर हरनायजोँ
रंजामोन आंनि गोरलै गोसोआ
23.
फैयो आंखौ बामनो
गामिनि बयबो-
मोदोमफ्रु देलायनानै-
24.
सोँदाव फैयो आयनि खोमायाव
मा मुं जाखो?
अननाय खुदुमनाय
मोसा होफैयो
25.
आयै आं गोसो खाङो-
अरलुना गय सावलेनाय
मिनिस्लुनायखौ-
26.
सायखं नुजानाय अखानि दैस्लुंआव
गोरबो मिनिस्लुयै
सायखंजोँ आं
मिनि मिनि रायदावनाय
बिलिर फैयो रंजानाय
27.
खोमसि हरनि अखोरांआव
जोँनाय हार्थखिनि बिबार बारिखौ
नायदाव हरनानै आं गोमोयो
27.
फुर्णिमा अखाफोर गावदांआ
सानजा फैसालियाव दर खेँफैयो
मिनिस्लु आयै आं मोन्नो हास्थायो
28.
बुरखायै बुरखायै आयै नोङो
आंखौ गोदो फुथुयो
बेसेबा गोजोन गोजोन-
29.
मुगासे बारलांनायनि उनाव
आं सिरिमोनो-
आयै आं गाबज्रिना
हब्रानाय समाव
सब खुदुमना एमनिफ्राय बोखाङो
30.
आयै नोँ आंनि अननायनि फिथिखा-
अननाय बिलिरनाय
गोरबोआव बोजबना लायो
31.
नोँनि अननाय नोँनि बिलिरनाय
बेसे मोजां आयै
बेसे गोजोनथाव-
32.
दांनाय बिलिरनाय
अननाय खुदुमनाय
नोँ अनसुलि आयै
नोँ गोजोन देरा आंनि-
33.
हमनानै दैबायनाय
रिमोनद्ला सिलायाव
गाग्रोमो जाया जाया-
34.
रंजायै मिनियै आंनि थाबायनाय
बावनाय नङा आयै
आंलाइ नोँखौ-
35.
गाद्लुनना खावब' जसोनाय समाव
दोँ दोँ खारबोना बामखांनाय
खुदुमनाय बिखायाव बोजबनाय
36.
आव आव बुरखायना फुथुनाय
आयै नोँ आंनि-
बावनो हाया आंलाइ नोँखौ-
37.
हाबाब आयै आंनि-
नोँनो जिउ आंनि दैथिँगिरि-