थिरिँ बिरिँ 1028-1090 Poem by Ronjoy Brahma

1028
लाबोथोँ गोरबोआव
गोदान जिउनि हांख्रायनाय
बे गियानखौ आं नागिरो।
1029
जंफात नोजोरजोँ
आं दाखासे जोमैखौ नायहरो
सिरिसे अखा हाहोनो
हाद्रि जानाय मुलुगाव।
1030
जिउनि फागुणा बेजोँनो फैयो
रोदा रोदा खुसिनि आगानजोँ
जोँमा मोखांजोँ देलाय देलाय।
1031
बे अन्नायखौ
बेसे लाखोमानो आंलाय?
बे गोजोन्नायखौ बेसे सिखोमानो?
1032
खोमसि बे हराव
आंनि मावनाय बिखायाव
फै एब्रेफै गसाइ
आंनि खर'आव बिलिर बिलिर
मावनाय बिखाखौ सेंहोफै।
1033
बायलुं माथोजोँ
रायदाव हरो आं आयखौ
आयनि मिनिनाय नायनो
आयनि फिन्नाय नेनानै।
1034
आंनि गोरबोआव मोदै
थरथिँ थरथिँ गसरो
बोहैयो गोगो अन्नाय दुखुनि फाखनजोँ।
1035
गोरबोआव दुखुनि जिलिद
आलौखां होयो
अब्लाबो बेवहायनो रंजानाय
गुसु मोदैया नुजायो।
1036
बिसोरनि गाबनायखौ
आं गाबालासे थानो हाया
अब्ला गोजोनालासे थानोबो हाया।
1037
जिउनि बोहैथिया
जिउनि दाहारजोँसो थुंगेगोन
गोरबो जिउ रंजानायजोँ
लासै बोहैनाय निजोरा।
1038
गोरबोआ आंनि गोदान जिउ
बोहैयो गोथार लैथो मोखांजोँ
दुखु-हांमा जोबगोन खुसियै।
1039
दैसा आंनि गोसोआ
खौसेनि देँखोआव बोहैयो
उदां गंसे मुलुगाव
जिउ दैमानि लामाजोँ।
1040
बे गुसुआ
रंजालु दैसा सुजुनाय
जिउनि गोगो निजोरा।
1041
फुंनि जोँमानि सोरांजोँ
आयनि दैहु फाफेरबोनाय
अनखाङो आं
गुसुथियाव मिनिसुलु महर।
1042
थाजिम सानस्रियाव
बिलाइ खिलियो गोरान दालाइ दालाइ
नांगौसेबां गोरबोआव अखा हायो।
1043
दिनै बे समाव
माला आंनि गोदोनायाव
गोदान रंजानाय गोरबो।
1044
जोमैबादि गोसोम हाद्रि
खर' सा सा
मोदोम गंसे गोलोमदै
आफाया मावथि बिदिन्थानि।
1045
दानिया आं सोलायबाय
गावखौनो देलायहोनो
उदांनि गेरेमसा मिजिँजोँ।
1046
असे लोगो नोङो
आंखौ थुलुंगा होयो
गोरबो गोथौआव थानानै।
1047
बे गुसु हराव
निहोर गोग्लैफैयो उखुमाव
रैसुमै थरथिँ थरथिँ।
1048
आं आंनि गोसोखौ फोथायो
मानोना गोसोजोँनो आंनि मिजिँ
गोसोआ गोथार जिहेतु।
1049
बे रेगाया मिनिनायनि
दुखुआव रंजानायनि
जाफुंगोन मिजिँनि।
1050
आयनिबादि आंनि गाबनाय
महरनि सिमा गैयै
आयनि मिजिँ सुफुंनो।
1051
आं बुजिदोँ दिनै
आंनि मेगनजोँ नङा
गोरबोजोँ थरथिँ थरथिँ गसरदोँ मोदै।
1052
फुषनि हरजोँ
जेन्नांदोँ हावरिया जोनोमा
अब्लाबो अरखौ आं सुखाङो।
1053
उन्दु रोमा रोमि
उदांनि हर गेजेराव
मानि रादाब निहोरनि
उन्दुनो होआ आंखौ।
1054
लोगो-
आं सुखुनि बिबायारि नङा
दुखुखौ आं दाफै दाफै होनाखै।
1055
आंनि मिनिसुलु गुसुथियाव
मिथिँगानि महर बेरखाङो
जायखौ आं नायहरो।
1056
गुसु मिथिँगानि
सोमखोर सोमखोर बिलाइजोँ
मिजिँ सुफुंनो थाबायो आं।
1057
आंनि मेंङै गोसोआ
लैथोआव सानस्रिबायो
गोगो गोथौसिनाव।
1058
दाउब' बास्रिनाय निजोम हराव
आं आर'ज गाबदोँ
फैबावथोँ सान आरो सोरां।
1059
आंनि दोन गाबगोन
दुखु सैयै सैयै
नाथाय गाबोननि सानखौ
खुसिजोँ साजायगोन।
1060
रजे नोँनि थाखाय
आं गावखौनो बावगाराखै
आं थांखियाव दोरोदा।
1061
बे मोजां मोन्नाया
सोदोबथि गैयै
रुगुं गैयै सिमानि
मानोना मोजां मोनखोमानाय बियो।
1062
आं सान्दोँ
हाबायानो जोबथि रादाय
जोनोमनि थामथि गान्थि।
1063
बिखुंनि खामि हाराखौ
हाखु-दाखु मानो सिफायनो
आं खामिखौ फोराबावगोन।
1064
मेलेम खाथियै खाथियै
मिथिँगानि सिबियारि आं
सिन्ताजोँनो आंनि गोजोन्नाय।
1065
गुसुखौ फैनो हायै
गोदोनायाव फन्ना लादोँ आर'नाइ
बिसोर आंखौ नायगोमोयो।
1066
सानस्लिँनाय नोजोरजोँ
नायहरो आं दाखासे जोमै
बुखार जागोन बियो बारजोँ।
1067
थैनानै थांनाय
बैसोरखौ आं बावलाङो
थैनायखौ गोरबो खोमानानै।
1068
हायना नांनाय
फैलाव बै अखोरांआव
आरो हायना फोनाङो
बै फुरसब जोमैया।
1069
हाजि हाजि दान्दि खालामफैनाय
दाउस्रि जरासेनि मेथाइखौ
खोनासंदोँ आं बुजिमोनै।
1070
आयनि खुसियाव
आं नुयो
आं मोजाङैनो दं
जिउनि थांखि आरो मिजिँआव।
1071
आं थाबायलांगोन
समजोँ-
हाजो गाखोना
सोर्गोनि अख्रां दांहैगोन।
1072
गोदै गोथाव अर सालायजोँ
खामग्लिनाय आहुतिनि प्रसाद
गोजोन बिलिर फैयो बारजोँ
आंनि गोरबो गोरबो।
1073
बे हराव
जेन'बा खै खै मिनिहरदोँ
जोँथि माथि बुहुम मोखां हाथर्खि।
1074
बे बाउलि बाराव
बिरलांदोँ गोसोआ
जोमैनिफ्राय जोमैसिम
अख्रां दांहैनो।
1075
अन्थाइ रेजेद्नाय लामायाव
गोग्लैहां जायो आंनि हां
खारनायखौ आं हमथायाखै आब्लाबो।
1076
सानजानि सोरां रोदाया
इनजुराव नांफैदोँ
इनजुर सौसिना आंखौ फोजाफैदोँ।
1077
खोमसिया खारलांबाय
सोरांनि गोफाद जिलिदखौ गिनानै
बहाबा नुयै थानाव।
1078
दै सान्ति सारनायबादि
बिलिरफैदोँ निहोर
सुदेम मोन्नाय सोलेर।
1079
मिनिसुलु गोसोआव
सोरां होयो मिनिनाय
गोजोन मिथिँगा बिखायाव।
1080
नोँखौ नुनानै गेवलाङो
आंनि मोखां
फुंनि बे लांगोनायाव।
1081
थांना थानायानो मुलुग
जिउनि मेथाइ बिनिनो
रोजाबो आं मिथिँगाखौ लानानै।
1082
लाजिनांनायखौ लानानै
आं थांनानै थानो लुबैया
नाथाय दुखुखौबो आं मुगैया।
1083
इयुननि गोदै मिजिँजोँ
आंनि थांनानै थानाय
समायना दं बेवहाय जोनोमनि।
1084
बायदि गाब गानानै
जिउनि लामाया गेङो
बै समायना लामाजोँ थाङो
आंनि गोसो।
1085
आर'जनि दैलो खबामा
आंखौ गोजोन होयो
बुहुमखौ सोरां नुयो आं
लामायाव गियानखौ मोनो।
1086
सिलानि हाद्रिया आंखौ
उन्दै समनि गोसोखां होयो
नाथाय बावहाबो बिसम्बि।
1087
मिजिँ गोनां लामायाव
दिनैनि दुखुआ सोगाबो
थांनानै थायो इयुनखौ हास्थायनानै।
1088
समायना जिउनि रंजानाया
गोरबोनि नुयै सावगारि
दोन्दोँ मोन्दांथिजोँ आखिना।
1089
बार बे समाव फै
सुदेम बिलिरनायजोँ
रंजाफै आंनि हाबायाव।
1090
गोसोम महरनि खोमसियाव
आंनि आगोर मोनै गोसो
नाथाय आंहा सोरां दं जिउनि।